Túrkimenstan 8 tamyzǵa deıin Qazaqstanmen shekarany japty

ASTANA. QazAqparat - Túrkimenstanda shekaradaǵy qaýipsizdik sharalary kúsheıtildi, sondyqtan 4 - 8 tamyz aralyǵynda jeńildetilgen tártipte respýblıkaǵa baratyn shetel azamattary ýaqytsha kirgizilmeıdi, dep habarlaıdy Pm.kz.

Buryn qol jetkizilgen kelisimge sáıkes, Mańǵystaý oblysynda turatyn Qazaqstan Respýblıkasy azamattary Túrkimenstannyń Balqan ýálaıatyna 5 táýlikke deıin vızasyz kire alady.

Qazaqstan azamattarynyń turatyn orny jeke kýáliktegi (tólqujattaǵy) turǵylyqty meken-jaı belgisi negizinde anyqtalady.  

Túrkimenstan  Respýblıkasynyń ulttyq zańnamasyna sáıkes, Qazaqstan azamattary jeńildetilgen kirý merzimderinen artyq tıisti tártipte vıza resimdegen jaǵdaıda júre alady.

Jeńildetilgen tártip áreket etetin QR azamattary TR aýmaǵyna halyqaralyq qatynastar úshin anyqtalǵan ótkizý beketteri arqyly atalǵan aýmaqtan kirip, shyǵa alady.

Qazir qazaqstandyq-túrkimendik shekarada «Temir-baba» avtomobıldi ótkizý beketi ornalasqan. Onda keden beketi men «Bolashaq» temirjol kedendik beketi ornalasqan. 

Eske sala ketsek, «Temir-baba» shekara mańyndaǵy ótkizý beketi Qaraqııa aýdanynda Aqtaý qalasynan 335 shaqyrym jerde ornalasqan. «Bolashaq» temirjol kedendik beketi avtomobılderdi ótkizý beketinen 80 shaqyrym jerde ornalasqan.