Túrki jazýy kúni atalyp ótildi

ASTANA. QazAqparat - Búgin Halyqaralyq Túrki akademııasynda dástúrli mereke - Túrki jazýy kúni qarsańynda birqatar zııaly qaýym ókilderiniń basyn qosqan dóńgelek ústel ótti. Bul týraly akademııanyń baspasóz qyzmetinen habarlandy.

Qazaqstan Respýblıkasy Parlamenti Májilisiniń bastamasymen bekitilip, Túrki keńesiniń Bodrým sammıtinde Memleket basshylary maquldaǵan Túrki jazýy kúni byltyr Halyqaralyq Túrki akademııasy tarapynan alǵash ret atalyp ótilgeni belgili. Bıyl aýqymyn keńeıtip, elimizdiń birqatar óńirlerinde merekelene bastaǵan bul ataýly kúndi ózge de túbi bir túrki halyqtary jyl saıyn dástúrli túrde atap ótýge qoldaý bildirip otyr. Osyǵan oraı Akademııada ótken jıynǵa belgili ǵalymdar men qoǵam qaıratkerleri Myrzataı Joldasbekov, Ádil Ahmetov, Seıit Qasqabasov, Qýanysh Sultanov, Zeınolla Samashev jáne taǵy basqa tanymal tulǵalar qatysyp, Túrki jazýy kúnin atap ótýge baılanysty óz oılaryn ortaǵa saldy.

Jıyn sońynda QR Parlamenti Májilisiniń depýtaty, kórnekti memleket jáne qoǵam qaıratkeri Qýanysh Sultanov túrki álemine sińirgen eńbegi úshin Halyqaralyq Túrki akademııasynyń Qurmet gramotasymen marapattaldy.

Sondaı-aq, Halyqaralyq Túrki akademııasynyń Qazaqstan Prezıdenti Nursultan Nazarbaevtyń tikeleı basta masymen qurylǵanyna osy aıda 5 jyl tolyp otyrǵany da atalyp ótti.