Túrki memleketteri uıymynyń halyqaralyq róli artyp kele jatyr - Prezıdent

SAMARQAND. QazAqparat - Memleket basshysy Qasym-Jomart Toqaev Túrki memleketteri uıymy sammıtiniń otyrysynda sóz sóılep, kezekti basqosýdyń asa mańyzdy ekenin aıtty, dep habarlaıdy QazAqparat.

Osy jıynǵa qatysyp otyrǵanyna rızashylyq tanytqan Prezıdent eń aldymen osy is-sharany joǵary deńgeıde uıymdastyryp, zor qonaqjaılyq kórsetip, jyly qarsy alǵan Ózbekstan Prezıdentine erekshe alǵysyn jetkizdi.

«Jıynymyz Túrki áleminiń maqtanyshy – kóne Samarqand shaharynda ótip jatyr. Bul qala tarıhı tamyry tereń órkenıet oshaǵy retinde búkil álemge tanymal. Samarqand qalasy Jibek jolynyń altyn kópiri ekenin barsha túrki halyqtary moıyndaǵan.

Osy kıeli jerde Túrki memleketteri uıymyna tóraǵalyq etý quqyǵy Ózbekstan Respýblıkasyna beriledi. Ózbek baýyrlarymyz bul mindetti abyroımen atqarady dep senemin», - dedi Qasym-Jomart Kemeluly.

Memleket basshysy búginde Túrki memleketteri uıymynyń halyqaralyq róli artyp kele jatqanyn alǵa tartty.

»Biz Túrki áleminiń atajurty retinde ózderińizben jan-jaqty qarym-qatynasty damytýǵa aıryqsha mán beremiz. Sondyqtan, yqpaldastyǵymyzdy odan ári nyǵaıtýǵa jáne ony jańa beleske kóterýge múddelimiz. Túrki yntymaqtastyǵyna uıytqy bolǵan uıymdardyń tarıhyn zerdelesek, olardyń kópshiligine Qazaqstan bastamashy bolǵanyn kóremiz. TÚRKSOI, TúrkPA jáne Túrki Akademııasy – sonyń aıqyn dáleli. Bul uıymdar baýyrlas elderdiń mádenı-rýhanı jaqyndasýyna ólsheýsiz úles qosyp otyr», - dedi Q.Toqaev.