Túrki memleketteri uıymy Qazaqstandaǵy saılaýǵa qatysty baǵa berdi

ASTANA. QazAqparat – Túrki memleketteri uıymy bas hatshysynyń orynbasary, uıym atynan kelgen baıqaýshylar mıssııasynyń basshysy Sadı Djafarov Qazaqstanda 19 naýryzda saılaýdy uıymdastyrýǵa qatysty pikir bildirdi, dep habarlaıdy QazAqparat tilshisi.

«Mıssııa músheleri baıqaýshy retinde Astana qalasyndaǵy birqatar ýchaskede boldy. Daýys berý bastalǵanǵa deıin, 17 naýryzda birneshe partııanyń ókilimen kezdesip, olardyń daıyndyǵymen tanystyq. Delegatsııa partııalardyń baǵdarlarmasyna, qarjylyndyrýǵa, medıa resýrstarda aqparat taratýǵa qatysty málimetterdi talqylady. Sonymen qatar, bizdiń mıssııa QR Ortalyq saılaý komıssııasynyń tóraǵasy Nurlan Ábdirovpen de kezdesti. Osy oraıda ol saılaý protsesine qatysty tolyq málimet berdi», - dedi Sadı Djafarov elordadaǵy Halyqaralyq baıqaýshylarǵa qolǵabys kórsetý ortalyǵynda ótken brıfıngide.

Onyń aıtýynsha, 19 naýryz kúni Túrki memleketteri uıymy ókilderi tańerteń Astanada ashylǵan ýchaskelerde bolǵan.

«Ýchaskelerdiń ashylýy ulttyq zańnama talaptaryna sáıkes iske asyryldy. Jalpy, bizdiń mıssııa 32 saılaý ýchaskesine bardy. Biz tıisti monıtorıng júrgizdik jáne onyń barysynda eleýli kemshilikter bolǵan joq. Atap aıtqanda, saılaýdy uıymdastyrý men ótkizý zań talaptary aıasynda ótti», - dedi Sadı Djafarov.