Túrki memleketteri ekonomıkalyq yntymaqtastyqty kúsheıtýge nıetti
«Qazirgi ýaqytta barynsha tyǵyz yntymaqtastyqty jolǵa qoıý arqyly ekonomıkalyq zertteýler ortalyqtarynyń arasyndaǵy baılanysty kúsheıtý qajet. Bizdiń oıymyzsha, oǵan sol ınstıtýttar men sarapshylar arasynda jeli qurý arqyly qol jetkizýge bolady», - dedi Halyqaralyq túrki akademııasynyń prezıdenti Shahın Mustafaev.
Onyń atap ótýinshe, sońǵy birneshe jyldyń ishinde túrki memleketteri arasyndaǵy yntymaqtastyq jaqsara túsken.
«Oǵan ońaılyqpen qol jetkizilgen joq. Ol saıası kóshbasshylarymyzdyń sarabdal saıası sheshimderi arqyly ret-retimen, birtindep júzege asyryldy. 2021 jyly Túrki álemin damytý baǵdarlamasy qabyldanǵannan keıin túrki memleketteriniń kóshbasshylary yntymaqtastyq damytý jóninde mindetteme aldy», - dedi akademııa prezıdenti.
Sonymen qatar ol ótken jyly Samarqand qalasynda túrki memleketteri arasyndaǵy ıntegratsııany odan ary kúsheıtý jónindegi forým ótkenin jáne onda 2022-2040 jyldarǵa arnalǵan damý strategııasy qabyldanǵanyn eske saldy.
«Endi elderimizge atalǵan bastamany júzege asyrý úshin naqty ıdeıalar talap etiledi. Qazir Úkimetterimizge ońtaıly sheshimder izdeýge kómektesýimiz úshin seriktestik qajet. Halyqaralyq túrki akademııasynyń prezıdenti retinde ekonomıkalyq máselelerge barynsha nazar aýdarýǵa qatysty naqty kózqarasym bar. Túrki akademııasy túrki memleketteri arasyndaǵy ekonomıkalyq ózara is-qımyldy talqylaý úshin alań usyna alady», - dedi Shahın Mustafaev.