Túrki keńesiniń sammıtine daıyndyq barysy talqylandy

NUR-SULTAN. QazAqparat - Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Túrkitildes memleketterdiń yntymaqtastyq keńesiniń (Túrki keńesi) Bas hatshysy Baǵdad Ámireevpen kelissózder ótkizdi, dep habarlaıdy QR SІM baspasóz qyzmeti.

Kezdesý barysynda Túrki keńesiniń kún tártibindegi ózekti máseleler qarastyrylyp, onyń 2021 jyly Túrkistanda ótýi josparlanǵan beıresmı sammıtine daıyndyq jumystary talqylandy.

Túrki keńesi Qazaqstan Respýblıkasynyń Tuńǵysh Prezıdenti – Elbasy, Túrki keńesiniń Qurmetti tóraǵasy Nursultan Nazarbaevtyń bastamasymen 2009 jyly 3 qazanda quryldy. Halyqaralyq uıymnyń shtab-páteri Ystanbul qalasynda ornalasqan. Uıymnyń músheleri Qazaqstan, Ázerbaıjan, Qyrǵyzstan, Túrkııa, Ózbekstan, al Majarstan baqylaýshy mártebesine ıe.