Túrki keńesiniń Bas hatshysy Tegeranda EYU Hatshylyǵynda kezdesýler ótkizdi
Aıta keterligi, atalǵan sapar EYU men Túrki keńesi arasynda qol qoıylǵan ózara túsinistik týraly memorandýmda bekitilgen yntymaqtastyqty jandandyrýǵa jáne eki uıym arasynda ózara is-qımyldy óristetýge baǵyttalǵan.
Sapar barysynda delegatsııa EYU Hatshylyǵynyń Dırektorlary men Baǵdarlama qyzmetkerlerimen ekijaqty kezdesýler ótkizdi. EYU Hatshylyǵynda ótken tehnıkalyq jıyn barysynda taraptar saýda, ınvestıtsııa, keden, kólik, týrızm, aýyl sharýashylyǵy, bilim berý jáne energetıka sekildi basym baǵyttar boıynsha ózderiniń atqarǵan jumysy týraly aqparat almasyp, tájirıbemen bólisti. Budan bólek, eki uıymnyń Bas hatshylary EYU men Túrki keńesi arasyndaǵy yntymaqtastyqtyń salalar boıynsha jumys baǵdarlamasyn qabyldaý týraly ýaǵdalasty.
«EYU-nyń Bas hatshysy Hadı Sýleımanpýr Túrki keńesi hatshylyǵynyń delegatsııasyna alǵysyn bildirip, eki uıym arasyndaǵy tyǵyz qarym-qatynastardy nyǵaıtý maqsatyndaǵy alǵashqy sapardyń mańyzdylyǵyn atap ótti. Ol sonymen birge, aımaqtaǵy saıasatty úılestirý qajettiligin aıtyp, uıymdar arasyndaǵy túrli salada kúsh-jigerdi biriktirý óńirdiń jalpy damýyna yqpal etetinine toqtaldy. Óz kezeginde Túrki keńesiniń Bas hatshysy Baǵdad Ámireev eki uıym ókilderiniń atqarǵan jumysy ózara yntymaqtastyqty arttyratyndyǵyn jáne ortaq maqsattardy júzege asyrý jolynda oń nátıjeler beretinin jetkizdi», - delingen baspasóz baıanynda.
Kezdesý qorytyndysy boıynsha taraptar jylyna bir márte uıym sarapshylarynyń kezdesýin uıymdastyrýǵa kelisip, 2019-2020 jyldarǵa arnalǵan jumys baǵdarlamasyn ázirleýdi aıaqtady.
Budan bólek, EYU-ǵa jumys sapary aıasynda Túrki keńesiniń Bas hatshysy Baǵdad Ámireev Iran Islam Respýblıkasynyń syrtqy ister mınıstriniń orynbasary Abbas Arakchımen kezdesip, Túrki keńesi men EYU arasyndaǵy yntymaqtastyq máselelerin talqylady.