Túrki keńesiniń Bas hatshysy Qyrǵyz prezıdentiniń qabyldaýynda boldy

BІShKEK. QazAqparat - Túrki keńesiniń Bas hatshysy Baǵdad Ámireev Bishkek qalasyna resmı sapary aıasynda Qyrǵyz Respýblıkasynyń prezıdenti Sooronbaı Jeenbekovtiń qabyldaýynda boldy. Bul týraly QazAqparat «Kabar» agenttigine silteme jasap habarlaıdy.

Kezdesý barysynda Sooronbaı Jeenbekov Túrkitildes memleketterdiń yntymaqtastyq keńesiniń (Túrki keńesi) Bas hatshysy Baǵdat Ámireevti jańa qyzmetke taǵaıyndalýymen quttyqtap, tabys pen jemisti eńbek tiledi. Óz sózinde prezıdent Qyrǵyzstannyń Túrki keńesine tóraǵalyǵy kezinde aıtýly sharalar ótkizýdi josparlap otyrǵanyn jáne jaqsy bastamalar men usynystar úshin árdaıym ashyq ekenin atap ótti. Ol ekonomıka salasyndaǵy yntymaqtastyq máselelerin aldyńǵy qatarǵa shyǵarý qajettigine de toqtaldy.

Óz kezeginde Bas hatshy Baǵdat Ámireev 2018 jyldyń jazynda Qyrǵyzstanda osy eldiń tóraǵalyǵymen ótken Túrki keńesi otyrysynyń tabysty bolǵanyn atap ótti. «Qyrǵyz Respýblıkasynyń Keńeske tóraǵalyǵy kezinde memleketaralyq qatynastar odan da joǵary deńgeıge kóteriletinine senimdimin», - dep atap ótti Ámireev.

Sondaı-aq, prezıdent qabyldaýynda Túrkitildes elder Parlamenttik Assambleıasynyń (TúrkPA) Bas hatshysy Altynbek Mamaıýsýpov ta boldy.

TúrkPA Bas hatshysy kezdesýde túrkitildes memleketter yntymaqtastyǵy protsesiniń oń dınamıkasyn, parlamenttik baǵyttaǵy jumystyń jandanyp jatqanyn atap ótti.