Túrki keńesi: Sadyr Japarov Qazaqstan men Ózbekstan prezıdentterine alǵys aıtty
«Bul sammıt bastapqyda Túrkistan qalasynda ótýi kerek bolatyn. Bul shahardyń tarıhı mura retindegi róli joǵary. Degenmen pademııa bul sammıt boıynsha jospardy ózgertip, onlaın rejımde uıymdastyrylyp otyr. Bul turǵyda tsıfrlyq dıplomatııa jaqsy múmkindik berip tur jáne osynyń arqasynda baılanysqa shyǵyp otyrmyz. Barshalaryńyzdy Naýryz merekesimen quttyqtaımyn! Ejelden bul meıramdaǵy ortaq qundylyqtarymyz túrki tildes álemniń negizgi murasy. Jańa jylda Túrki tildes memleketterdiń yntymaqtastyq keńesi ary qaraı da halyqtarymyzdyń bolashaǵy úshin jumys isteıdi degen úmittemin», - dedi S. Japarov.
Sonymen qatar Qyrǵyzstan Prezıdenti QR Tuńǵysh Prezıdenti, Túrki keńesiniń qurmetti tóraǵasy Nursultan Nazarbaevqa alǵys aıtty.
«Sizdiń Túrki keńesine qosqan úlesińiz óte joǵary. Sizdiń bergen keńesterińiz býyrlas memleketterdiń dostastyǵy men qýatyn arttyrady degen úmittemin», - dedi Sadyr Japarov Elbasy N. Nazarbaevqa qarata aıtqan sózinde.
«Men sammıtke alǵash ret Prezıdent retinde qatysyp otyrmyn. Biraq búgin sammıt onlaın ótkizilip jatqanymen, aldaǵy ýaqytta betpe-bet kezdesýge múmkindik alamyz dep senemin», - dedi ol.
Munymen qosa Qazaqstan Prezıdenti Qasym-Jomart Toqaev pen Ózbekstan Prezıdenti Shavkat Mırzıeevke alǵysyn aıtty.
«Men resmı saparmen barǵan kezde qabyldaǵany úshin eki eldiń prezıdentterine rızashylyǵymdy bildiremin. Bolashaqta osy túrki tildes ózge de elderdiń basshylarymen kezdesý múmkindigine ıe bolamyn degen úmittemin», - dedi Sadyr Japarov.