Túrki qaǵanaty zamanynan qazirge deıingi qarýlardyń damý tarıhy 2 mınýt ishinde kórsetildi - VIDEO
2-5 maýsym aralyǵynda Astanada ótetin IV halyqaralyq «KADEX» qarý-jaraq pen áskerı-tehnıkalyq múlik kórmesi qarsańynda «120 sekýnd ishindegi qarýdyń shyǵý tarıhy» atty rolık jasaldy. Kórermenderge Túrik qaǵanaty kezinen bastap qazirgi kúnge deıingi Qazaqstan aýmaǵynda paıdalanylǵan qarýdyń túrleri kórsetildi.
Rolıkte sadaq jáne Túrik qaǵanaty men Qazaq handyǵynyń jebeleri, bilte myltyǵy, soqqy-shaqpaqtas qulpy bar myltyq, kapsıýldi tetigi bar myltyq, HH ǵasyrdyń basy men birinshi jartysynyń qarýy, Ekinshi dúnıejúzilik soǵys kezindegi qarý, áıgili Kalashnıkov avtomaty men onyń modıfıkatsııalary, HH ǵasyrdyń ózge de qarýy kórsetilgen. Qazirgi ýaqyttaǵy qarý retinde rolıkte Qazaqstan Qarýly Kúshteri arnaıy bólimsheleriniń jaraqtandyrýynda turǵan zamanaýı vıntovka kórsetilgen. Osylaısha, 2 mınýt ishinde kórermen nazaryna elimizdiń tarıhynyń ártúrli kezeńderinde, ıaǵnı, Qazaq handyǵynyń qurylǵanǵa deıingi kezeń, Qazaq handyǵy, KSRO, táýelsiz Qazaqstan quramynda qoldanylǵan qarýdyń túrleri usynylady.
Búginde Qazaqstan Respýblıkasynyń Qarýly Kúshterinde qoldanylyp júrgen qarý-jaraqty 2-5 maýsym aralyǵynda Astanadaǵy QR QK-niń avıatsııalyq bazasynda ótetin IV halyqaralyq «KADEX» qarý-jaraq pen áskerı-tehnıkalyq múlik kórmesinde nıet bildirgen barsha qaýym tamashalaı alatynyn aıta keteıik.