Túrki halyqtarynyń tatýlyǵy men birligin nyǵaıtýda TMYK mańyzdy orynǵa ıe
Kezdesýge sonymen qatar QR Qoǵamdyq damý mınıstri Darhan Káletaev, Túrkııa Jastar jáne sport mınıstri Mehmet Kasapoglý, Ázerbaıjan Jastar jáne sport vıtse-mınıstri Ismaıl Ismaılov, Qyrǵyz Jastar, dene shynyqtyrý jáne sport isteri agenttiginiń dırektory Qanat Amanqulov qatysty, dep habarlaıdy QazAqparat tilshisi.
Júzdesý barysynda Memlekettik hatshy Elbasy Nursultan Nazarbaevtyń «Uly dalanyń jeti qyry» atty maqalasyndaǵy: «Qazaqstan - kúlli túrki halyqtarynyń qasıetti «Qara shańyraǵy. Búgingi qazaqtyń saıyn dalasynan álemniń ár túpkirine taraǵan túrki tektes taıpalar men halyqtar basqa elder men óńirlerdiń tarıhı úderisterine eleýli úles qosty» degen sózderin atap ótti.
«Halyqaralyq arenada túrki halyqtarynyń tatýlyǵy men birligi ıdeıasyn nyǵaıtý isinde Túrki tildes memleketter yntymaqtastyǵy keńesi mańyzdy (TMYK) oryn alady», - dep atap ótti Gúlshara Ábdiqalyqova.
Memlekettik hatshy atalǵan keńestiń qoldaýymen jastar jáne sport salasynda belsendi túrde is-sharalar ótkizilip kele jatqanyn aıtty. Máselen, Baký qalasynda 2018 jylǵy sáýirde tuńǵysh ret túrki tildes elderdiń stýdenttik oıyndary, qyrkúıekte Sholpan-Ata qalasynda Kóshpendilerdiń ІІІ oıyndary ótkizildi. Kóshpendilerdiń kelesi oıyndaryn 2020 jyly Túrkııada ótkizý josparlanǵan.
«Kelesi jyl Qazaqstan úshin mazmundy bolmaq. 2019 jyly «Jastar jyly» dep jarııalandy. Bul jastarǵa, olardyń muń-muqtajyna, Qazaqstannyń bolashaǵyna erekshe kóńil bólýdyń kórinisi», - dedi Memlekettik hatshy.
Kezdesý sońynda Gúlshara Ábdiqalyqova qatysýshylarǵa Túrki tildes memleketter yntymaqtastyǵy keńesi aıasyndaǵy ózara is-áreketti odan ary nyǵaıtý isinde tabys tiledi.