Túrki halyqtarynyń aqyndary Túrkistanda bas qosty

ShYMKENT. QazAqparat -  Túrkistannyń túrki áleminiń mádenı astanasy atanýy aıasyndaǵy is-sharalar áli de jalǵasýda. Q.A.ıAsaýı atyndaǵy Halyqaralyq qazaq-túrik ýnıversıtetinde túrki halyqtary aqyndarynyń kezdesýi ótti, dep habarlaıdy «QazAqparat» HAA tilshisi.

Kezdesýge Qazaqstan, Túrkııa, Ázerbaıjan, Qyrǵyzstan, Saha-ıAkýtııa, Bashqurtstan, Tatarstan, Gagaýz syndy elderden qonaqtar keldi. TÚRKSOI Halyqaralyq uıymynyń uıǵarymymen bul jolǵy kezdesý Ázerbaıjannyń belgili aqyny Molla Panah Vagıftiń 300 jyldyǵyna oraı uıymdastyryldy.

Túrkistan qalasynyń ákimi Álipbek Óserbaev túrki aqyndarynyń bas qosýy kıeli shahar jurtshylyǵyna  jańa serpin beretindigin atap ótti. Al TÚRKSOI halyqaralyq uıymyndaǵy Mádenıet jáne sport mınıstrliginiń ókili Asqar Turǵanbaev Molla Panah Vagıftyń ózi aýdarǵan óleńderinen úzindiler oqydy.

Jınalǵan qaýymǵa ázerbaıjan poezııasynyń jańa betin ashyp, ony halyqqa jaqyndata bilgen Molla Panah Vagıf jaıynda túsirilgen fılm kórsetilip, jergilikti ónerpazdardyń kontserttik baǵdarlamasy usynyldy. Osylaısha,  Túrki álemi aqyndarynyń bas qosýy óleńmen órnektelip, baýyrlastyqtyń týy jelbiredi.