Túrki elderimen ortaq oqýlyqtar boıynsha mańyzdy sheshimder qabyldandy

ANKARA. QazAqparat - 4 qarashada Ystanbulda Halyqaralyq Túrki akademııasynyń VI Ǵylymı keńesi ótti. Otyrysta «Ortaq túrki tarıhy», «Túrki áleminiń geografııasy» jáne «Ortaq túrki ádebıeti» oqýlyqtary boıynsha mańyzdy sheshimder qabyldandy, dep habarlaıdy QazAqparat.

Jıynda sóz alǵan Túrik akademııasynyń prezıdenti Darhan Qydyráli daıyndalǵan oqýlyqtar týraly keńinen maǵlumat berdi. «Ortaq túrki tarıhy» oqýlyǵyn ázirleý jumystary máresine jetkenin atap ótken Qydyráli «Túrki áleminiń geografııasy» men «Ortaq túrki ádebıeti» oqý quraldarynyń da daıyn ekenin málimdedi. Sonymen qatar, ortaq oqýlyqtar ázirleý jumystaryna qoldaý kórsetken taraptarǵa alǵysyn aıtty.

Túrkııa Respýblıkasynyń Ulttyq bilim mınıstri Mahmýt Ózer «Ortaq túrki tarıhy» pániniń mazmuny mańyzdy sanalǵandyqtan joǵarǵy synyp deńgeıine deıin qabyldanǵanyn aıtty. Buǵan qosa, mınıstr 2022-2023 oqý jylynan bastap 9, 10 jáne 11-synyptarda «Túrki áleminiń geografııasy» jáne «Ortaq túrki ádebıeti» oqýlyqtarynyń tańdaý páni retinde engiziletinin jetkizdi.

Qazaqstan Respýblıkasynyń Bilim jáne ǵylym mınıstri Ashat Aımaǵambetov Qazaqstan mektepterinde «Ortaq túrki tarıhy» páni sátti oqytylyp jatqanyn atap ótti.

Ázerbaıjannyń Bilim mınıstri Emın Amrýllaev «Ortaq túrki tarıhy» aýqymdy joba ekenin aıtyp, akademııanyń osy turǵydaǵy jumysyn joǵary baǵalady.

Qyrǵyzstannyń Bilim jáne ǵylym mınıstri Bolotbek Kýpeshev ortaq oqýlyqtar engizýdi qoldaıtynyn bildirip, atalǵan baǵyttaǵy máselelerdi zertteıtin birlesken komıssııa qurýdy usyndy.

Osy oraıda Túrkııa tarapy óziniń tóraǵalyǵy aıasynda ortaq oqýlyqtar boıynsha arnaıy jıyn uıymdastyrýdy usyndy.

Qarastyrylyp otyrǵan usynystardyń mańyzdylyǵyn aıta kele, Túrki akademııasynyń prezıdenti mundaı mańyzdy qadamdardyń protsesti jedeldete túsetinine senim bildirdi.

Aıta keteıik, sondaı-aq osy kúni Ystanbulda Halyqaralyq Túrki akademııasy Ǵylymı keńesiniń 4-sh otyrysy ótti. Ǵylymı keńes músheleri birqatar máseleler boıynsha naqty sheshimder qabyldady. Atap aıtqanda, túrki áleminiń tuǵyrly tulǵalarynyń mereıtoılarynyń tizimi, bilim jáne ǵylym salasyndaǵy yntymaqtastyqty nyǵaıtý máseleleri, ǵylymı-zertteý jobalary talqylanyp, basymdyqtar bekitildi.

Budan bólek, Ǵylymı keńestiń otyrysy barysynda is basyndaǵy tóraǵalyqty Ázerbaıjan tarapynan Túrkııa qabyldap aldy.