Túrki elderi Parlamenttik Assambleıasy Ankara deklaratsııasyn qabyldady
Májilistiń baspasóz qyzmetinen málim etkendeı, aldymen uıymǵa múshe elder Qazaqstan, Ázerbaıjan, Qyrǵyzstan jáne Túrkııa Parlamenti jetekshileri TúrkPAnyń Keńesi otyrysynda bas qosty. Májilis spıkeri Túrkııa tarapyna qonaqjaılyq tanytyp, búgingi is-sharany joǵary deńgeıde uıymdastyrǵany úshin rızashylyq bildirdi.
Bıyl Túrki memleketteri Parlamenttik Assambleıasyna 15 jyl tolyp otyr. Osy ýaqyt ishinde biraz sharýa atqaryldy. Assambleıa áleýeti mol birlestik ekenin dáleldep keledi.
Keńes otyrysynda Assambleıanyń jumysyn odan ári jandandyrý úshin birqatar uıymdastyrýshylyq máseleler talqylandy. Jıynda uıymda tóraǵalyq etý mártebesi Qyrǵyz Parlamentiniń tóraǵasynan Túrkııa Parlamenti basshysyna saltanatty túrde tapsyryldy.
Sonan keıin TúrkPA-ǵa múshe elder Parlamentteriniń jetekshileri birlestiktiń HІІ plenarlyq otyrysyna jınaldy. Oǵan qonaq retinde kelgen Túrikmenstan Parlamenti basshysy men baqylaýshy mártebesine ıe Majarstan Parlamentiniń ókili qatysty. Al Ózbekstan Olıı Majlısi Senatynyń jetekshisi jıynǵa onlaın rejıminde qatysty.
Taraptar túrki dúnıesiniń keleshegine qatysty mańyzdy máselelerdi ortaǵa saldy. Májilis Tóraǵasy ózara senim men dostyqqa negizdelgen yntymaqtastyqtyń arqasynda túrki halyqtarynyń birligi nyǵaıyp, dúnıejúzilik qoǵamdastyqta bedeli artyp kele jatqanyn atap ótti.
«Bizdiń memleket basshylarymyz túrki áleminiń damýy jolynda sheksiz úles qosyp keledi. Osydan bir jarym aı buryn Ankarada Túrki memleketteri uıymynyń kezekten tys sammıti ótti. Onda kóshbasshylar bizdiń baýyrlas elderimiz arasyndaǵy ózara is-qımyldy odan ári nyǵaıtýǵa baǵyttalǵan mańyzdy sheshimder qabyldady. Osyǵan oraı biz de óz tarapymyzdan parlamentaralyq is-qımyl arqyly kóshbasshylarymyzdyń qarqynyna ilese bilýimiz kerek», – dedi Erlan Qoshanov.
Otyrys barysynda kún tártibindegi energetıka, kóshi-qon jáne azyq-túlik taqyryby jan-jaqty talqylandy. Bul túrki memleketteri úshin ózekti máselege aınalyp otyr.
Óz kezeginde, Májilis spıkeri Erlan Qoshanov túrki keńistiginde energetıkalyq jáne azyq-túlik qaýipsizdigin kúsheıtýge basa nazar aýdardy. Kóshi-qon salasynda da yntymaqtastyqty arttyrý qajet ekenin aıtty. Bul máseleni jan-jaqty talqylaý úshin halyqaralyq ǵylymı-tájirıbelik konferentsııa uıymdastyrýdy usyndy.
Erlan Qoshanov Qazaqstan Túrki áleminiń qara shańyraǵy retinde túrki ıntegratsııasynyń odan ári damýyn qoldaıtynyn málimdedi.
«Bıyl qazan aıynda Túrki memleketteri uıymynyń 10-shy mereıtoılyq Sammıti túrki áleminiń altyn besigi – kıeli Túrkistan shaharynda uıymdastyrylyp, tóraǵalyq Qazaqstanǵa ótedi. Osy turǵyda barlyq túrki birlestikterimen birigip, «Túrki áleminiń keleshegi – 2040» baǵdarlamasyn iske asyrý boıynsha is-sharalar josparyn qabyldaýymyz qajet. Jáne Parlamenttik Assambleıa retinde onyń oryndalýyn qadaǵalaýǵa tıispiz», – dedi Májilis spıkeri.
Spıker osy bastamalardyń barlyǵyn parlamenttik dıplomatııa arqyly iske asyrýǵa, túrki halyqtarynyń birligi men dostyǵyn odan ári nyǵaıtýǵa shaqyrdy.
Otyrys sońynda taraptar Ankara deklaratsııasyn qabyldady.
TúrkPA-nyń kelesi HІІІ jıyny 2024 jyly Ázerbaıjanda ótedi.
Aıta keteıik, «Túrki áleminiń keleshegi – 2040» – túrki tildes halyqtar arasyndaǵy qarym-qatynasty kúsheıtýge yqpal etetin biregeı baǵdarlama. Qujatta túrki tildes qoǵamdastyqtyń uzaq merzimdi maqsattary kórsetilgen. Ol saýda, tranzıt, energetıka, jasyl ekonomıka, týrızm, ınvestıtsııa, shaǵyn jáne orta bıznes sııaqty baǵyttardaǵy yntymaqtastyqty nyǵaıtýdy kózdeıdi.