Túrki elderi Eýropanyń energetıkalyq qaýipsizdigin qamtamasyz etýdegi rólin nyǵaıta alady

ASTANA. QazAqparat – Túrki elderi mańyzdy geosaıası oıynshyǵa aınala alady. Bul týraly «Túrki álemindegi ekonomıkalyq baılanys jáne ıntegratsııa» taqyrybyndaǵy sarapshylar otyrysynda Ázerbaıjannyń burynǵy Premer-Mınıstri Gasan Gasanov aıtty, dep habarlaıdy QazAqparat tilshisi.

«Transkaspıı dálizi kópbeıindi, naqtyraq aıtqanda, temir jol, avtomobıl men avıatsııalyq dálizge aınalady. Buǵan qosa, «Qytaı-Qyrǵyzstan-Ózbekstan-Túrikmenstan-Ázerbaıjan» jobasy da pysyqtalyp jatyr. Energetıkalyq qubyr kólik júıesin damytý da Transkaspıı dáliziniń quramdas bóligi bola alady», - dedi ázerbaıjandyq sarapshy.

Onyń atap ótýinshe, kóbeıindi Transkaspıı dálizi sátti damyǵan jaǵdaıda Eýropanyń energetıkalyq qaýipsizdigin qamtamasyz etý isinde túrki memleketteriniń rólin aıtarlyqtaı nyǵaıta alady.

«Bul bizdiń uıymdy mańyzdy geosaıası oıynshyǵa aınaldyrady», - dedi Gasan Gasanov.

Buǵan deıin ol «Shyǵys-Batys» transkaspıı halyqaralyq orta dálizin tek qysqa ǵana emes, sonymen birge qaýipsiz ári kedendik jáne tranzıttik protsedýralary úılesimdi, tıisti halyqaralyq konventsııalardyń tıimdi oryndalýyn qamtamasyz etetin tabysty dálizge aınaldyrý kózdelip otyrǵanyn aıtqan bolatyn.