Túrki áleminiń jas qalamgerleri Ystanbulda bas qosty

ASTANA. QazAqparat - Búgin Ystanbul qalasynda Túrkııa Respýblıkasynyń Mádenıet jáne týrızm mınıstrligi men Eýrazııa jazýshylar odaǵynyń uıymdastyrýymen Túrki álemi jas aqyn-jazýshylarynyń birinshi festıvali bastaldy, dep habarlaıdy QazAqparat Túrki akademııasy halyqaralyq uıymynyń resmı portalyna silteme jasap.

Alǵash uıymdastyrylǵan sharaǵa Ázerbaıjan, Qazaqstan, Qyrǵyzstan, Ózbekstan, Soltústik Kıpr Túrik Respýblıkasy, Túrkııa men Túrikmenstannan jáne basqa 22 túrki aımaǵynan kelgen 58 jas ádebıetshi qatysýda.

Óz elderinde kitaptary shyqqan nemese ádebı ortada birshama tanylǵan jas qalamgerler Túrki álemi ádebıetindegi zamanaýı úrdister men taqyryp, janr alýandylyǵy jaıly pikir alysyp, ózara tájirıbe almaspaq. Budan bólek, uıymdastyrýshylardyń aıtýynsha, keleshek túrki ádebıetin qalyptastyrýshy jastar elderine oralǵan soń bir-birleriniń shyǵarmalaryn óz tilderine aýdarady dep kútilýde.

Sonymen birge Álı Akbash (Túrkııa), Anar (Ázerbaıjan), Tólen Ábdik (Qazaqstan) pen Ismaıl Bozkýrt (Soltústik Kıpr Túrik Respýblıkasy) syndy qalamy qarymdy tanymal aqyn-jazýshylar jas ádebıetshilerge dáris oqyp, ómirlik tájirıbelerimen bólisedi dep josparlanǵan.

Baǵdarlamasy túrli ádebı jáne mádenı sharalardy qamtıtyn festıval 4 kúnge jalǵasyp, 18-shi tamyzda qorytyndylanady.