Túrki áleminiń sýretshileri Otyrar jáne Saýran qalashyqtaryn aralady

ShYMKENT. QazAqparat - «Túrkistan - Túrki áleminiń mádenı astanasy» jyly aıasyndaǵy HH-shy TÚRKSOI uıymyna múshe elderdiń sýretshileriniń pleneri Otyrar jəne Saýran qalashyqtary men Arystan bab kesenesinde jalǵasyn tapty, dep habarlaıdy QazAqparat HAA tilshisi.

Ońtústik Qazaqstan oblysyna arnaıy kelgen  Túrki áleminiń sýretshileri Otyrar jáne Saýran qalashyqtaryn aralady. Tarıhı oryndardyń keshegi jáne búgingi keıipin beıneledi. Arystan bab kesenesi men tarıhı, mádenı eskertkishterdi saldy. Tájirıbeli fotograftar bolsa qoınaýy tarıhqa toly qasıetti jerlerdiń sýretterin túsirdi.  Ońtústik óńiriniń ózindik tabıǵı geografııalyq erekshelikteri men kóz tartarlyq oryndaryn beıneleıtin halyqaralyq deńgeıdegi óner shyǵarmalaryn jasap, nasıhattaýǵa tyrysty. Beıneleý ónerinde jańa kórkem baǵyttar jáne plastıkalyq sheshimder men formalardy izdestirýdi nazarǵa aldy.

Plenerge kelgen 9 memlekettiń qylqalam sheberleri aldaǵy kúnderi Han taǵy men Qarataý qoryǵy aýmaǵy, Báıdibek aýdanynyń Aqmeshit pen Qostura aımaǵy, sondaı-aq  Qazyǵurt, Saıram-Ógem taý shatqaldary, Shymkent qalasynyń kórikti oryndaryna saparlaıdy dep kútilýde.

Al, 22 tamyzda oblystyq Beıneleý óneri mýzeıiniń kórme zalynda  plener barysynda salynǵan jumystardyń qorytyndy kórmesiniń ashylý saltanaty men marapattaý rásimi ótetin bolady.