«Túrki álemin toǵystyrǵan - Syr eli» festıvali ótti
Atalmysh ıgi shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy boıynsha uıymdastyryldy. Sońǵy kúnderi Syr óńirinde «Qorqyt jáne Uly dala sazy» halyqaralyq folklorlyq-mýzykalyq óner festıvali ótkizilgen edi. Sol shara barysynda túrkitildes elder jastary Syr topyraǵynda bas qosty.
Bul shara jastar jyly aıasynda qolǵa alynyp otyr. Ony ótkizýge oblystyq jastar saıasaty máseleleri basqarmasynyń qoldaý bildirdi. Oǵan elimizdiń barlyq óńirinen jınalǵan jastarmen birge Túrkııa, Tatarstan, Qyrǵyzstan, Bashqurstan jáne Ázerbaıjan elderiniń shyǵarmashyl jáne ónerpaz jastary qatysty.
«Halyqaralyq sharanyń maqsaty – túrkitildes elder jastarynyń qarym-qatynasyn nyǵaıtý, ortaq tarıhy men rýhanı qundylyqtaryn nasıhattaý, jastar saıasatynda oń bastamalar boıynsha jastardyń basyn qosyp, tájirıbe almasý, ishki týrızmdi damytýǵa jańa múmkindik ashý, qasıetti Syr eli - kıeli ólkeniń tarıhymen tanystyrý», - dep atap ótti atalmysh sharany uıymdastyrýshylar.
Jastar festıvaline kelgen meımandar Qyzylorda qalasynda oryn tepken «Rýhanı jańǵyrý» murajaıymen tanysty. Sondaı-aq, oblystyq tarıhı ólketaný mýzeıinde jáne qalamyzdyń sol jaǵalaýynda boı kótergen «Jastar ortalyǵy» jańa ǵımaratynda boldy. Sonymen qatar, QR Aqparat jáne qoǵamdyq damý mınıstrliginiń Jastar jáne otbasy komıteti, oblystyq assambleıanyń etno-mádenı ortalyǵynyń jastary jáne oblystyń belsendi jastarymen birge kezdesý ótti. Kezdesýden soń jastar A.Toqmaǵambetov atyndaǵy qalalyq mádenıet úıinde uıymdastyrylǵan kontserttik baǵdarlamasyn tamashalady.
Budan buryn Qyzylordada Qorqyt muralary jóninde ǵylymı konferentsııa ótti.