Túrki akademııasynda Túrkııa Respýblıkasynyń 95 jyldyǵy atap ótildi
Merekelik sharaǵa birqatar memleketterdiń elshileri, TWESCO-ǵa quryltaıshy elderdiń ókilderi, túrkologtar qatysty.
«Túrkııa halqyn búgingi ulttyq merekesimen, Respýblıka kúnimen quttyqtaımyn. Kezinde Mustafa Shoqaı Túrkııaǵa barǵanda óz maqalasynda «Túrki kindiginen taraǵan árbir azamattyń eki otany bar, onyń biri - kindik qany tamǵan týǵan jeri bolsa, ekinshi otany - Túrkııa» dep jazǵan eken. Shyn máninde qurylǵanyna 95 jyl tolyp otyrǵan Túrkııa Respýblıkasy árbir túrki násilinen týǵan azamattyń ekinshi otany ispetti qyzmet atqardy. Bizdiń Halyqaralyq Túrki akademııasynyń quryltaıshylarynyń biri», - dedi Halyqaralyq Túrki akademııasynyń prezıdenti Darhan Qydyráli óziniń quttyqtaý sózinde.
Sonymen birge, akademııa basshysy jaqynda mańyzdy sheshim qabyldaǵandaryn jetkizdi.
«Akademııanyń quryltaıshy memleketteriniń barlyq memlekettik merekeleri men ataýly kúnderin Túrki akademııasynda joǵary deńgeıde atap ótýdi uıǵardyq», - dedi Darhan Qydyráli.
Óz kezeginde Túrkııanyń Qazaqstan Respýblıkasyndaǵy Tótenshe jáne Ókiletti Elshisi Nevzat Ýıanyk Qazaqstan jurtshylyǵy men Halyqaralyq Túrki akademııasyna alǵys bildirdi.
«Atajurtymyz Qazaqstanda Respýblıka kúnimizdi toılaý biz úshin maqtanysh. Túrkııa Respýblıkasy Birinshi dúnıejúzilik soǵystan keıin Osman ımperııasynyń quldyraýymen qurylǵan bolatyn. Baýyrlas Qazaqstannyń astanasynda, Halyqaralyq Túrki akademısıasynda bas qosqanymyzǵa kýanyshtymyn. Búgingi mereke Túrkııada da saltanatty túrde toılanyp jatyr. Eki el arasynda baýyrlastyq pen dostyq, ásirese memleket basshylary arasyndaǵy jyly qarym-qatynas dostyǵymyzdyń odan ári damýyna áser etip jatyr. Táýelsizdigimiz, dostyǵymyz jáne baýyrlastyǵymyz máńgilik bolǵaı», - dedi Túrkııa elshisi.
Sonymen birge, sharaǵa kelgen Ázerbaıjan Respýblıkasynyń Qazaqstandaǵy Tótenshe jáne Ókiletti Elshisi Rashad Mamedov jáne Mońǵolııanyń Qazaqstandaǵy Tótenshe jáne Ókiletti Elshisi Lývsan Battýlga Túrkııa elshisin quttyqtap, óz lebizderin bildirdi.
Aıta keteıik, 1920 jyly 23 sáýirde grek-túrik soǵysy kezinde qurylǵan Uly ulttyq jınalys Túrkııany Respýblıka retinde jarııalaǵan bolatyn. Alaıda, respýblıka 1923 jyldyń 29 qazanynda ǵana resmı túrde moıyndaldy.
Túrkııa - Ońtústik-Shyǵys Eýropa men Ońtústik-Batys Azııada ornalasqan memleket. Soltústik-batysynda Bolgarııa, Grekııamen, soltústik-shyǵysynda Grýzııa, Armenııamen, shyǵysynda Iranmen, ońtústiginde Irak, Sırııamen, sondaı-aq soltústiginde Qara teńizben, soltústik-batysynda Mármár teńizimen, ońtústiginde Jerorta teńizimen, batysynda Egeı teńizimen shektesedi.