Túrki akademııasynda túrik jazýshysy Ómer Seıfettındi eske alý sharasy ótti

NUR-SULTAN. QazAqparat – Búgin, 6 naýryzda Halyqaralyq Túrki akademııasynda ıÝ.Emre atyndaǵy túrik mádenı ortalyǵy jáne Nazarbaev Ýnıversıteti qazaq tili jáne túrkitaný kafedrasynyń qoldaýymen kórnekti túrik jazýshysy Ómer Seıfettınniń ómirden ozǵanyna 100 jyl tolýyna oraı eske alý sharasy ótti, dep habarlaıdy QazAqparat twesco.org saıtyna silteme jasap.

Halyqaralyq Túrki akademııasy men ıÝ.Emre atyndaǵy túrik mádenı ortalyǵy uıymdastyrýymen ótetin alqaly jıynǵa Túrkııa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Ýfýk Ekıdjı, Halyqaralyq Túrki akademııasynyń prezıdenti Darhan Qydyráli, Túrkııa elshiliginiń qyzmetkerleri, Nazarbaev Ýnıversıtetiniń qazaq tili jáne túrkologııa departamentiniń dotsenti Fýnda Gúven, tanymal ǵalymdar, zııaly qaýym ókilderi, bilim ordalarynyń qyzmetkerleri men stýdentteri qatysty.

Akademııa basshysy Ó. Seıfettındi eske alý jylynda túrki elderinde atqarylatyn is-sharalar men jaryq kóretin kitaptar týraly aıtyp berdi.

Sondaı-aq, Nazarbaev Ýnıversıtetiniń qazaq tili jáne túrkitaný departamentiniń dotsenti Fýnda Gúven «Zamanaýı túrik halqynyń ulttyq bolmysynyń negizderi: Ómer Seıfettın» taqyrybynda ǵylymı baıandama jasady.

Budan keıin ıÝ. Emre túrik mádenı ortalyǵynyń stýdentteri Naǵıma Zor men Aıgerim Talen Ó.Seıfettınniń «Qyzyl shapan» áńgimesinen túrik jáne qazaq tilderinde úzindi oqydy. Olarǵa kórnekti jazýshyny eske alý sharasyna belsendi qatysqany úshin Akademııanyń arnaıy sertıfıkattary tabys etildi. Shara aıasynda Ómer Seıfettın kitaptarynyń kórmesi uıymdastyryldy.

Aıta ketý kerek, 30 qańtarda Baký qalasynda ótken Halyqaralyq Túrki akademııasyna múshe elderdiń Bilim jáne ǵylym mınıstrleriniń úshinshi keńesinde Túrki álemi boıynsha 2020 jylǵy mereıli datalar qataryna kórnekti túrik jazýshysy Ómer Seıfettınniń 100 jyldyǵy da engen edi.