Túrki akademııasyna jańa ǵımarat salynbaıtyn boldy
«Túrki akademııasynyń halyqaralyq uıym ekenin bilesizder. Sondyqtan onyń basshylyǵyn Qazaqstan Respýblıkasy taǵaıyndamaıdy. Tıisti saılaý tártibi bar. Qazirgi ýaqytta Qazaqstan azamaty osy halyqaralyq uıymdy basqarady. Uıym on jyldan astam ýaqyt jumys istep keledi. Bul uıym úshin arnaıy ǵımarat salynbaıdy. Dıplomatııalyq qalashyqta ornalasqan ǵımarattardyń biri berildi. ıAǵnı, osy ýaqytqa deıin bar ınfraqurylym halyqaralyq uıymǵa ýaqytsha paıdalanýǵa beriledi. Bul jaǵdaıda jańa qurylys pen qosymsha shyǵyndar josparlanyp otyrǵan joq», - dedi Ashat Aımaǵambetov Senat otyrysynan keıin tilshilerge bergen suhbatynda.
Aıta keteıik, búgin Senat túrkitildes memlekettermen yntymaqtastyqqa qatysty qujatty qabyldady. «QR Úkimeti men Túrki akademııasy arasyndaǵy Túrki akademııasyn ornalastyrýdyń sharttary men tártibi týraly kelisimdi ratıfıkatsııalaý týraly» Zańy qabyldandy.
Kelisim kúshine engennen keıin akademııanyń jergilikti jáne sheteldik qyzmetkerleri Syrtqy ister mınıstrliginde akkredıtteýden ótýi tıis bolady. Shetel qyzmetkerleri úshin bul olardyń el aýmaǵynda bolýyna negiz bolyp sanalady.