Túrki akademııasyn qarjylandyrýǵa bıýdjetten 1 mln dollar bólindi – Ashat Aımaǵambetov

NUR-SULTAN. QazAqparat – Halyqaralyq Túrki akademııasyn qarjylandyrý úshin el bıýdjetinen 1 mln dollardan astam qarjy bólindi. Bul týraly QR Bilim jáne ǵylym mınıstri Ashat Aımaǵambetov aıtyp berdi, dep habarlaıdy QazAqparat tilshisi.

«Túrki akademııasynyń qyzmetin onyń quramyna kiretin barlyq elder qarjylandyrady. Bul Túrkııa Respýblıkasy, Qyrǵyzstan, onyń ishinde Qazaqstan. Olar tıisinshe osy uıymnyń jáne dál túrkitildes elderdegi basqa da uıymdardyń qyzmetin mólsherles shamalas kólemde qarjylandyrady», - dedi Ashat Aımaǵambetov Senat otyrysynan keıin tilshilerge bergen suhbatynda.

Mınıstrdiń aıtýynsha, árbir uıymda memleketterdiń qarjylandyrý úlesi shtab-páterdiń ornalasqan jerine baılanysty ózgerip otyrady.

«Mysaly shtab-páteri Bakýde ornalasqan TúrkPA-ǵa kelsek, Bakýdyń qarjylandyrý úlesi onyń teń jartysyn quraıdy. Túrkııadaǵy TÚRKSOI jáne basqa da uıymdar bar, olardyń shamamen 46-48 paıyzy Túrkııa bıýdjetinen qamtamasyz etiledi. Bul jaǵdaıda Túrki akademııasy Qazaqstan aýmaǵynda bolǵandyqtan, qalyptasqan dástúr men praktıka boıynsha bizdiń jarnamyz shamamen 46 paıyzdy quraıdy. Bıýdjet jyl saıyn ózgerip otyrady. Bıyl Qazaqstan bıýdjetinen 1 mıllıon dollardan astam qarajat bólindi», - dep túsindirdi A. Aımaǵambetov.

Aıta keteıik, búgin Senat túrkitildes memlekettermen yntymaqtastyqqa qatysty qujatty qabyldady. «QR Úkimeti men Túrki akademııasy arasyndaǵy Túrki akademııasyn ornalastyrýdyń sharttary men tártibi týraly kelisimdi ratıfıkatsııalaý týraly» Zańy qabyldandy.

Buǵan deıin Ashat Aımaǵambetov Túrki akademııasyna jańa ǵımarat salynbaıtynyn aıtqan edi.