Túrki akademııasy Mońǵolııada halyqaralyq dala semınaryn uıymdastyrdy

ASTANA. QazAqparat - Mońǵolııanyń Kentaı aımaǵynda Túrki akademııasy halyqaralyq uıymy (TWESCO) men Mońǵolııa Ulttyq mýzeıiniń qoldaýymen uıymdastyrǵan «Kentaıdan Ulytaýǵa deıin: tarıhı jadynyń jańǵyrýy» atty ІІІ halyqaralyq ekspedıtsııa aıasynda halyqaralyq dala semınary ótti.

TWESCO saıtynyń habarlaýynsha, ǵylymı sharaǵa akademııa basshysy Darhan Qydyráli, Mońǵolııa Ulttyq mýzeı dırektory D.Súhbaatar bastaǵan kórnekti tarıhshy, arheolog jáne túrkitanýshy ǵalymdar men eki eldiń beldi buqaralyq aqparat quraldarynyń ókilderi qatysty.

Halyqaralyq eskpedıtsııa músheleri semınar aldynda Shyńǵys hannyń týǵan jeri - Býrhan Haldýn taýyna shyqty. 

Ekspedıtsııalyq top osy aımaqtaǵy Haıaa Hýdag jáne Gúnbúrd kóne túrki ǵuryptyq keshenderine arheologııalyq qazba jumystaryn júrgizip, jan-jaqty zertteıdi dep josparlanǵan.

Mońǵolııa jerine osymen úshinshi ret uıymdastyrylǵan bul ekspedıtsııa Qazaqstan memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda kóterilgen qasterli jerler men tarıhı sanany jańǵyrtýdy maqsat tutady.

Aıta keterligi, ekspedıtsııaǵa qatysýshylar Mońǵolııa men Qazaqstandaǵy kóne túrki tarıhy úshin mańyzdy jerlerdi júrip ótedi. Osylaısha Býrhan Haldýn taýynan bastalǵan ekspedıtsııa Ulytaýdaǵy Alasha han, Joshy han kesenesine deıin jalǵasatyn bolady.