Túrki akademııasy Mońǵolııa ǵalymdaryn marapattady

ULANBATYR. QazAqparat - Halyqaralyq Túrki akademııasynyń prezıdenti Darhan Qydyráli Mońǵolııanyń Kenteı aımaǵy aýmaǵynda júrgizilip jatqan arheologııalyq qazba jumystarymen tanysyp, ǵylymı semınar ótkizdi, dep habarlaıdy QazAqparat TWESCO baspasóz qyzmetine silteme jasap.

Semınar barysynda akademııa basshysy Haıahýdag jáne Gýnbýrd keshenderindegi qazba jumystarynyń mańyzyna toqtaldy. Darhan Qydyráli Mońǵolııadaǵy túrki dáýiri eskertkishteriniń jańa baǵytta zerttele bastaǵanyn atap ótti. Álemdik ǵylymı qaýymdastyq budan buryn Orhon ózeni boıyndaǵy kóne túrki eskertkishterine kóbirek kóńil bólgen bolsa, halyqaralyq uıym men Mońǵolııa ulttyq mýzeıiniń birlesken ekspedıtsııasy Kerýlen ózeni alqabyn nazarda ustap otyr. Ǵalymdar bul óńirde túrki dáýirine tán kóptegen eskertkishter men ǵuryptyq keshenderdiń saqtalǵanyn atap ótti. Túrki akademııasynyń basshysy uzaq merizimge josparlanǵan bul jumystardy «Kerýlen ekspedıtsııasy» dep ataý qajet ekendigin aıtty.
Sondaı-aq, dalalyq ǵylymı-semınar barysynda Halyqaralyq Túrki akademııasynyń prezıdenti Mońǵolııa ulttyq mýzeıiniń dırektory Dagvaadorjyn Súhbaatardy akademııanyń Vılgelm Tomsen medalimen, arheolog Chınboldyn Baıandelgerdi Qurmet gramotasymen marapattap, qazba jumystaryna qatysyp jatqan ǵylymı qyzmetkerlerge alǵys hattar tapsyrdy.