Túrki akademııasy men Japonııa ǵylymı ortalyǵy yntymaqtastyq ornatty

ASTANA. QazAqparat - Halyqaralyq Túrki akademııasynyń (TWESCO) prezıdenti Darhan Qydyráli men japonııalyq «Toe býnko» zertteý ortalyǵynyń professory Hısao Komatsý búgin ózara yntymaqtastyq týraly memorandýmǵa qol qoıdy, dep habarlaıdy QazAqparat tilshisi.

«Biz Japonııamen ǵylymı yntymaqtastyǵymyzdyń jaqsaryp kele jatqanyna qýanamyz. Jaqynda ǵana japon professory Tomohıko Ýıama myrza kelip dáris oqyǵan. Al Hısao Komatsý myrzanyń byltyrǵy dárisi óte tartymdy bolǵanyn bilesizder. Sondyqtan, taǵy da bizdiń akademııaǵa kelgen Hısao Komatsý myrzaǵa qosh keldińiz deımiz», - dedi Darhan Qydyráli.

Halyqaralyq Túrki akademııasy  men «Toe býnko» zertteý  ortalyǵy arasynda qol qoıylǵan yntymaqtastyq týraly memorandýmynda  túrkologııa salasynda birlese  jumys isteý, ǵylymı týyndylardy almasý, ǵalymdardyń ózara tájirıbe bólisýi tárizdi birqatar máseleler qamtylǵan.

«Bul Japonııadaǵy túrkitaný, shyǵystaný salasy men Túrki dúnıesi arasyndaǵy ǵylymı baılanysty nyǵaıta túsedi, sonymen qatar,  túrkitaný salasyndaǵy zertteýlerge serpin bolar dep senemiz. Biz sizdi budan da jıi kelip turýǵa shaqyramyz. Osy memorandým arqyly bizdiń sharalarymyz júıeli túrde óter dep senemiz», - dedi Darhan Qydyráli.

Osydan keıin professor Hısao Komatsý «Jańa tarıhı derekter negizinde  Abdýlrashıd Ibrahımniń qyzmeti jáne Japonııamen qarym-qatynas» taqyrybynda arnaıy lektsııa oqyp, HH ǵasyrdyń basyndaǵy tatar qaıratkerleri týraly aıtyp berdi. Atalǵan  lektsııany TWESCO  men Japon qory birlese uıymdastyryp otyr.  Túrik tilinde   ótken lektsııaǵa ǵalymdar,  halyqaralyq uıymdardyń ókilderi,  jýrnalıster qatysty.  Hısao  Komatsý  qaıratkerdiń  Japonııaǵa sapary, japondyq musylmandarmen baılanysyn zerttegen. Atalǵan  shara TWESCO-da japon ǵalymdarynyń qatysýymen ótip jatqan  ǵylymı lektsııalardyń jalǵasy  bolyp sanalady.