Túrki akademııasy 5 jyl boıy shyǵarǵan kitaptaryn Ulttyq akademııalyq kitaphanaǵa tartý etti (FOTO)

ASTANA. QazAqparat - Búgin Túrki akademııasy halyqaralyq uıymy Ulttyq akademııalyq kitaphanada óz tarapynan jaryq kórgen kitaptardyń jáne twesco.org aqparattyq, ǵylymı-tanymdyq portalynyń tanystyrylymyn ótkizdi. Atalmysh uıymnyń baspasóz qyzmetiniń habarlaýynsha, akademııa jyl basy - Naýryz merekesi qarsańynda, sondaı-aq Kórisý kúnine oraı áriptes uıymǵa 90-nan astam atalym boıynsha kitaptaryn tartý etti.

Alqaly basqosýǵa tanystyrylǵan kitaptardyń birqatar avtorlary, ulttyq-mádenı ortalyq jetekshileri, belgili ǵalymdar, mádenıet jáne qoǵam qaıratkerleri men zııaly qaýym ókilderi qatysty.

Saltanatty jıyndy quttyqtaý sózimen ashqan QR Mádenıet jáne sport mınıstriniń jaýapty hatshysy Qýatjan Ýálıev pen kórnekti memleket qaıratkeri, professor Myrzataı Joldasbekov «akademııasynyń shyn máninde túrkitaný ǵylymynyń tiregine» aınalǵanyn atap ótti.

Aıta ketý kerek, kópshilik nazaryna usynylyp otyrǵan kitaptar negizinen Halyqaralyq túrki akademııasyn qurýshy memleketter prezıdentteriniń Túrki keńesi sammıtterindegi tapsyrmalaryn júzege asyrý negizinde jaryq kórgen. Akademııa jumys isteı bastaǵan 5 jyl ishinde barlyǵy 93 atalym boıynsha kitaptar ázirlep shyǵarǵan.
2015 jyly 42 kitap jaryq kórdi. Olardyń ishinde «Túrki halyqtarynyń jylqy mádenıeti» (avtory A.Toqtabaı), «Altaı Respýblıkasynyń kónetúrki jazba eskertkishteri atlasy» (orys, túrik tilderinde, avtorlary - K.Konkobaev. N.Ýseev, K.Shabdanalıev), 1 416 bet bolatyn «Manas» entsıklopedııasy» men «Manas» sózdigi» (jalpy redaktsııasyn basqarǵan - akademık A.Akmatalıev), kórnekti abaıtanýshy M.Myrzahmetulynyń Abaıdyń 170 jyldyǵy aıasynda jaryq kórgen «Muhtar Áýezov abaıtanýshy ǵulama», «Abaıdy oqy, tańyrqa...», «Hakim Abaı murasyn tanyp bilýdiń 125 (1889-2014) jyldyq tarıhynan» atty úsh eńbegi, sondaı-aq belgili shyǵystanýshy K.Hafızovanyń «Órkenıetter dıalogy», «Órkenıetter toǵysyndaǵy shyǵys dıplomatııasy» atty kitaptary qatarly irgeli jobalar boıynsha jaryq kórgen biregeı basylymdar bar.

2015 jyly akademııada shyqqan kitaptardy ázirleýge Ázerbaıjan, Vengrııa, Qazaqstan, Qyrǵyzstan, Mońǵolııa, Nıderlandy, Ózbekstan jáne Ýkraınadan 15 sheteldik ǵalym atsalysyp, 6 tilde, atap aıtqanda, aǵylshyn, ázerbaıjan, qazaq, qyrǵyz, túrik jáne orys tilderinde jaryq kórgenin atap aıtý kerek.

Ótken jyldyń basty taqyryby bolǵan qazaq handyǵynyń 550 jyldyǵyna arnalǵan eki eńbek jarııalandy. Budan bólek tarıh, arheologııa jáne etnografııa boıynsha - 15, ádebıet, folklor jáne óner boıynsha - 13, til jáne lıngvıstıka boıynsha - 6, «Tuǵyrly tulǵalar» serııasymen 6 eńbek jaryq kórgen.

Sonymen birge, osy shara aıasynda akademııa basshysy D.Qydyráli túrki áleminiń ortaq aqparattyq keńistigin qalyptastyrý maqsatynda ashylǵan Halyqaralyq Túrki akademııasynyń www.twesco.org aqparattyq, ǵylymı-tanymdyq portalyn tanystyrdy. Túrki álemindegi ǵylymı, mádenı jańalyqtarmen, ǵylymı-tanymdyq derektermen jáne akademııanyń tynys-tirshiliginen qazaq, túrik, aǵylshyn jáne orys tilderinde bólisip otyratyn biryńǵaı portal 2015 jyldyń qyrkúıek aıynan bastap jumys istep keledi.