Túrki akademııasy 2018 jyldy «Maǵjan jyly» dep jarııalady

ASTANA. QazAqparat - Túrki akademııasy 2018 jyldy «Maǵjan jyly» dep jarııalady. Bul týraly búgin Túrki akademııasy halyqaralyq uıymynyń (TWESCO) basshysy Darhan Qydyráli Ortalyq kommýnıkatsııalar qyzmetinde ótken brıfıngte málim etti, dep habarlaıdy Qazaqparat.

Qazaqtyń kórnekti aqyny, Túrki áleminiń tulǵasy Maǵjan Jumabaevtyń týǵanyna bıyl 125 jyl tolady. Akademııa osyǵan oraı Túrkistan ıdeıasyn tý etken aqynnyń shyǵarmalaryn shet tilderge aýdaryp, basyp shyǵarýdy qolǵa aldy.

Atap aıtqanda, Akademııanyń ǵylymı jobasy aıasynda klassık aqynnyń shyǵarmalaryn ózbek tiline belgili aqyn Mýzafar Ahmad, mońǵol tiline aqyn-aýdarmashy Júkel Qamaı, altaı tiline shyǵystanýshy ǵalym, aqyn Brontaı Bedıýrov, ázerbaıjan tiline Fýzýlı Madjıdlı aýdara bastady. Budan bólek, Maǵjannyń jyrlaryn qyrǵyz, majar tilderine aýdarý josparlanǵan.

Aıta keterligi, byltyr TWESCO Mahambettiń shyǵarmalaryn mońǵol tiline aýdaryp, basyp shyqqan bolatyn. Sonymen qatar, brıfıngte Túrki akademııasy Túrki yntymaqtastyǵy uıymdarymen birlesip jyl boıyna aqynnyń ómiri men ádebı murasyna arnalǵan is-sharalar ótkizýdi josparlap otyrǵany jóninde aıtyldy.