Túrkııa astanasynda Mustafa Shoqaı týraly kitaptyń tusaýy kesildi

<p>Túrkııa astanasynda ótken &laquo;Mustafa Shoqaı jáne túrki álemi&raquo; konferentsııasynda Túrkistannyń táýelsizdigi úshin kúresken qaıratkerdiń taǵdyry týraly &laquo;Keńes Odaǵynyń túrki álemine qatysty saıasaty&raquo; atty kitaptyń tusaýy kesildi, dep habarlaıdy<a href="Kazinform" target="_blank" rel="noopener"> Kazinform.</a></p>

Túrkııanyń «Sahıpqyran» strategııalyq zertteýler ortalyǵy uıymdastyrǵan ǵylymı-tájirıbelik konferentsııasynda Mustafa Shoqaıǵa arnalǵan kitap tanystyryldy. 

Atalǵan eńbektiń avtory Mustafa Shoqaıdyń jeke basyna toqtalatyn sol ýaqyttyń qasiretti kezeńderin egjeı-tegjeıli sıpattaıdy. Kitapty túrik ǵalymy, Mımar Sınan ýnıversıtetiniń professory Abdýaqap Kara jazǵan jáne ol birden qazaq, orys, frantsýz tilderine aýdarylǵan.

Túrik professory qazaq memleketiniń qaıratkeri týraly kitap jazýǵa úsh jyl ýaqytyn jumsaǵanyn aıtady. Onyń sózinshe, Mustafa Shoqaıdyń ómirbaıany búkil túrki álemine úlgi, sondyqtan túrki elderiniń jastary bul týraly bilýi kerek. Avtor qazirgi kezeńde jas urpaqty otansúıgishtik, ulttyq salt-dástúr rýhynda tárbıeleý mańyzdy ekenin erekshe atap ótti. 

Foto: Akjıgıt Chýkýbaev/Kazinform

«Mustafa Shoqaıdyń ómirin, onyń eliniń táýelsizdigi jolyndaǵy kúreskerligin, taǵdyr taýqymetine tóze bilgen sátterin sýretteý biz úshin zor mártebe. Ol ómiriniń sońyna deıin óz eliniń táýelsizdigin saqtap qalýǵa tyrysty. Jalpy qazaq halqynyń ǵana emes, búkil túrki dúnıesiniń birligi men bostandyǵy úshin kúresti. Mustafa Shoqaıdyń shyǵarmalary týǵan jerden jyraqta júrgende Eýropa basylymdarynda jıi jarııalanyp turatyn. Sol kezdegi maqalalarynyń arqasynda búkil álem táýelsizdik pen erkindikti ańsaǵan Túrkistan halqymen tanys boldy. Kitapta frantsýz tilinde jaryq kórgen eń mańyzdy jáne ózekti maqalalar týraly baıandalǵan», - dedi túrik professory.

Birikken is-shara «Jahandyq jýrnalıster keńesi» túrik úkimettik emes qurylymynyń alańynda ótti. Aty ańyzǵa aınalǵan qoǵam qaıratkeriniń, sondaı-aq tutas túrki áleminiń bostandyǵy men táýelsizdigi úshin kúres ıdeologynyń ómiri men taǵdyry týraly túrik sarapshylary, qoǵamdyq-saıası toptary men ǵylymı zııalylary da sóz qozǵady.

Túrkııanyń burynǵy Mádenıet mınıstri Namyq Kemal Zeıbektiń aıtýynsha, Mustafa Shoqaı týraly kitaptyń álemniń birneshe tiline aýdarylýy - qazaqtyń saıası qaıratkeriniń tulǵasy tek túrki elderine ǵana emes, sonymen qatar Reseı men Eýropa elderine de qyzyqty ekenin bildiredi. Al onyń tálim-tárbıelik ıdeıalary qashanda ózekti, ár zamannyń talabyna saı.

Túrik tarıhyshysy Týgrýl Chamash ta Ankarada ótken kitap tusaýkeserinen alǵan áserimen bólisti. Onyń aıtýynsha, Mustafa Shoqaı túrki áleminiń búgingi máselelerine 100 jyl buryn jaýap berip ketken tulǵa.