Túrki memleketteri uıymynyń kezdesýinde Qazaqstan qandaı bastamalardy alǵa tartty

<p>ASTANA. KAZINFORM - Bishkekte Túrki memleketteri uıymyna qatysýshy elderdiń ekonomıka jáne saýda mınıstrleriniń 13-shi kezdesýi ótti, dep habarlaıdy QR Úkimetiniń <a href="https://primeminister.kz/news/zhasyl-karzhy-zhonindegi-kenes-ortalyk-bankter-kenesi-zhane-turan-aea-ashu-turki-memleketteri-uyymynyn-kezdesuinde-kazakstan-kanday-bastamalardy-alga-tartty-29203" target="_blank" rel="noopener">baspasóz</a> qyzmeti.</p>

Oǵan Qazaqstan Premer-mınıstriniń orynbasary – ulttyq ekonomıka mınıstri Nurlan Baıbazarov, sondaı-aq Ázerbaıjan, Túrkııa, Qyrǵyzstan, Ózbekstan jáne Vengrııadan kelgen delegatsııalar qatysty.

Kezdesýdiń basty taqyryby TMU-ǵa múshe memleketterdiń ekonomıkalyq damýy men yntymaqtastyǵyn odan ár nyǵaıtý máseleleri boldy.

Vıtse-premer Qazaqstan túrki ıntegratsııasynyń damýyna erekshe mán beretinin jáne baýyrlas memleketterdiń bastamalary men syndarly usynystaryn árqashan quptaıtynyn atap ótti.

«TMU aıasynda qurylǵan Túrki ınvestıtsııalyq qory ekonomıkalyq jáne ınvestıtsııalyq yntymaqtastyqty keńeıtýge, birlesken ınvestıtsııalyq jobalardy iske asyrýǵa, elderimizdiń qarqyndy ósýi men órkendeýi úshin kapıtaldardy, tehnologııalar men talanttardy tartýǵa degen ortaq umtylysty aıǵaqtaıdy», — dedi Nurlan Baıbazarov.

TMU elderiniń barlyq mınıstrleri Qazaqstannyń TMU Jasyl qarjy jónindegi keńesin, sondaı-aq TMU-ǵa múshe memleketterdiń Ortalyq (ulttyq) bankter Keńesin qurý týraly bastamalaryn qoldady.

TMU ekonomıka jáne saýda mınıstrleriniń kelesi kezdesýi Túrkistanda ótedi. Onda Qazaqstannyń barlyq TMU elderi qoldaǵan taǵy bir bastamasy «TURAN» arnaıy ekonomıkalyq aımaǵyn ashý josparlanyp otyr.

Anyqtama: Túrkitildes memleketterdiń yntymaqtastyq keńesi 2009 jylǵy 3 qazanda quryldy. 2021 jyly Keńes Túrki memleketteriniń uıymy bolyp qaıta quryldy.

2024 jyldyń 8 aıynyń qorytyndysy boıynsha Qazaqstan men TMU elderi arasyndaǵy ózara saýda kórsetkishi $7,2 mlrd-ty qurady.

2024 jyly TMU-nyń aıasynda Túrki ınvestıtsııalyq qory ıaǵnı, túrki álemi elderi ekonomıkalyq ıntegratsııasynyń alǵashqy birlesken qarjy ınstıtýty quryldy.

Túrki ıntegratsııasy tranzıttik-kólik máselelerinen bastap, ekonomıka, ekologııa, ǵylym, bilim, óner, týrızm, sport pen gýmanıtarlyq salaǵa deıingi yntymaqtastyqtyń keń aýqymyn qamtıdy.

Qazirgi ýaqytta uıymǵa 5 múshe jáne 2 baqylaýshy memleket kirgen. Oǵan múshe memleketter: Ázerbaıjan, Qazaqstan, Qyrǵyzstan, Túrkııa, Ózbekstan. Baqylaýshy memleketter: Vengrııa, Túrikmenstan.

Osyǵan deıin Qazaqstan men Túrki elderi donorlardyń biryńǵaı aqparattyq júıesin quratynyn habarladyq.