Túrki memleketteri uıymynyń Ádilet mınıstrler Keńesiniń birinshi otyrysy ótti

<p>ASTANA. KAZINFORM &ndash; Búgin Astana qalasynda Túrki memleketteri uıymyna qatysýshy memleketterdiń Ádilet mınıstrleri keńesiniń birinshi otyrysy uıymdastyryldy. QR Ádilet mınıstri Azamat Esqaraevtyń tóraǵalyǵymen ótken jıynǵa Ázerbaıjan, Qyrǵyzstan, Túrkııa jáne Ózbekstan Ádilet mınıstrleri, TMU-nyń Bas hatshysy Kýbanychbek Omýralıev qatysty.</p>

Otyrys QR Prezıdentiniń 2023 jylǵy 3 qarashadaǵy TMU-nyń H sammıtinde aıtylǵan tapsyrmasy sheńberinde uıymdastyrylǵanyn atap ótken jón.

Kezdesý barysynda qatysýshy memleketterdiń ádilet mınıstrlikteri arasyndaǵy yntymaqtastyqty damytý perspektıvalary qaraldy. Quqyqtyq ózara is-qımyldy nyǵaıtý jáne quqyqtyq saladaǵy yntymaqtastyqty odan ári damytý máselelerine erekshe nazar aýdaryldy.

Foto: QR Ádilet mınıstrligi

Otyrysqa qatysýshylar ádilet júıelerinde tsıfrlandyrýdyń mańyzdylyǵyn atap ótip, bul baǵyt aldaǵy ýaqytta sheshýshi ról atqaratynyn alǵa tartty. Keńestiń turaqty otyrystarynda osyndaı taqyryptardy talqylaý vedomstvoaralyq yntymaqtastyqty tereńdetýge jáne TMU-ǵa qatysýshy memleketterdiń ádilet organdary jumysynyń tıimdiligin arttyrýǵa múmkindik bermek.

Otyrys qorytyndysy boıynsha Keńestiń negizgi ýaǵdalastyqtary men odan ári jumys baǵyttaryn bekitetin Astana deklaratsııasyna qol qoıyldy.

TMU-ǵa qatysýshy memleketterdiń Ádilet mınıstrleriniń kelesi otyrysy 2025 jylǵa Ázerbaıjan Respýblıkasynda josparlanǵan.