Túrki mádenıeti jáne murasy qorynyń prezıdenti Mádenıet jáne aqparat mınıstrimen kezdesti

<p>ASTANA. KAZINFORM - Qazaqstan Respýblıkasyna resmı sapary aıasynda Túrki mádenıeti jáne murasy qorynyń prezıdenti Aqtoty Raıymqulova Qazaqstannyń Mádenıet jáne aqparat mınıstri Aıda Balaevamen kezdesti.</p>

Kezdesýde qor men uıymnyń quryltaıshy eli - Qazaqstan arasyndaǵy yntymaqtastyqtyń bar baılanystary atap ótildi. Taraptar aǵymdaǵy jáne kelesi jyly Qazaqstannyń baı mádenı murasyn qorǵaý jáne nasıhattaý salasyndaǵy qor qyzmetiniń baǵyttaryn talqylady.

Sondaı-aq, áńgime barysynda «Túrki áleminiń keleshegi-2040» strategııalyq baǵdarlamasy aıasynda qorǵa júktelgen «Túrki mádenı murasyn qorǵaý týraly Konventsııany» iske asyrý máseleleri boıynsha pikir almasty. Qordyń keńesin qurý týraly, sondaı-aq uıymǵa múshe elderdiń mádenıet mınıstrleriniń qatysýymen ótetin keńes otyrysyna daıyndyq jumystary týraly aıtyldy.

Qazaqstan Respýblıkasynyń Mádenıet jáne aqparat mınıstri Aıda Balaeva qor daıyndaǵan Konventsııanyń túrki álemi úshin mańyzdylyǵyn atap ótip, osy saladaǵy yntymaqtastyqqa qajetti qoldaý kórsetýge senim bildirdi, sondaı-aq qor keńesin qurý jónindegi kúsh-jigerin joǵary baǵalady jáne aǵymdaǵy jyldyń naýryz aıynda ótkizilýi josparlanyp otyrǵan keńes otyrysyna óziniń qatysatynyn rastady.

Kezdesý qor men Qazaqstan arasyndaǵy yntymaqtastyqtyń perspektıvalary men mańyzdy máselelerdi talqylaýmen jalǵasty.