Túrik mádenıeti jáne murasy qory Nıderland koroldiginde merekelik is-shara ótkizdi

<p>Gaagada túrik áleminiń uly qaıratkeri, Ázerbaıjannyń jalpyulttyq kóshbasshysy Geıdar Alıevtiń týǵanyna 100 jyl, Túrik Respýblıkasynyń qurylǵanyna 100 jyl jáne qazaq bıleýshisi Sultan Beıbarystyń týǵanyna 800 jyl tolýyna oraı merekelik is-shara ótti, dep habarlaıdy <a href="Kazinform" target="_blank" rel="noopener">Kazinform </a>agenttiginiń menshikti tilshisi.</p>

Merekelik is-sharany Halyqaralyq túrik mádenıeti jáne murasy qory Nıderland Koroldigindegi Qazaqstan, Ázerbaıjan men Túrkııa elshilikterimen birlesip uıymdastyrdy. Oǵan memlekettik qyzmetkerler, Nıderland Koroldiginiń depýtattary, elde tirkelgen dıplomatııalyq korpýs pen dıaspora ókilderi qatysty.

Qor prezıdenti Gıýnaı Efendıeva bıyl túrki áleminde júzege asyrylyp jatqan jobalardyń mańyzdy ekenin aıtty. Ásirese qazirgi táýelsiz Ázerbaıjannyń negizin salǵan, Jalpyulttyq kóshbasshy Geıdar Alıevtiń 100 jyldyǵyn erekshe atap ótti.

Geıdar Alıev memleketiniń aýmaqtyq tutastyǵyn qamtamasyz etken dana, kóregen saıasatker retinde álemge tanymal. Onyń respýblıka tarıhyndaǵy erekshe eńbegi – álem elderimen, onyń ishinde túrkitildes memlekettermen saıası, ekonomıkalyq, mádenı jáne ádebı baılanys ornatyp ketkeni.

Túrik Respýblıkasynyń qurylǵanyna 100 jyl tolǵanymen quttyqtap otyryp, Qor prezıdenti eldiń ortalyq memleket retindegi ornyn, ótken on jyldyqta qol jetkizgen halyqaralyq arenadaǵy jetistikterin atap ótti.

Sondaı-aq Gıýnaı Efendıeva Qazaqstandy uly bıleýshi Sultan Beıbarystyń týǵanyna 800 jyl tolýymen jáne ulttyq mereke – Respýblıka kúnimen quttyqtady. Qor basshysy az ýaqyt ishinde el júrgizgen saıası, ekonomıkalyq jáne áleýmettik reformalar oń nátıje bergenin aıtty.
Іs-sharaǵa qatysqan dıplomattar qordyń kóne túrki mádenı murasyn saqtap qalýǵa jáne tanytýǵa baǵyttalǵan jumysyna joǵary baǵa berdi. Sonymen qatar, túrik qoǵamynyń bedeli ósip kele jatqanyn atap ótti.

Merekelik is-shara aıasynda jeti túrik memleketi – Ázerbaıjan, Qazaqstan, Qyrǵyzstan, Túrkııa, Ózbekstan, Túrikmenstan men Majarstan ókilderinen quralǵan, kásibı mýzykanttar jınalǵan «Jeti sulý» mýzykalyq tobynyń kontserti uıymdastyryldy.