Týrızm jáne sport mınıstri Hanchjoýda sportshylarymyzdyń turmysymen tanysty

<p>Ermek Marjyqpaev Qazaqstan quramasynyń jedel shtabyna barǵannan keıin sportshylarymyzdyń Azıadaǵa daıyndyq barysymen tanysty, dep habarlaıdy QazAqparat Týrızm jáne sport mınıstrligine silteme jasap.</p>

Birinshi kezekte turǵyn úı-jaılardy qarap shyqty. Qazaqstandyq sportshylar zamanaýı jáne jaıly qonaqúıde, bir jáne eki oryndyq bólmelerge ornalasqan.

Odan keıin mınıstr, sportshylarymyz tamaqtanatyn ashanaǵa bardy. Sportshylardyń deni Hanchjoýǵa keldi, biraq soǵan qaramastan esh jerde kezek baıqalmady. Bul uıymdastyrý deńgeıi men sapasy joǵary ekenin kórsetedi.

Ermek Marjyqpaev ulttyq quramanyń medıtsınalyq shtabyn da nazardan tys qaldyrmady. Qytaıǵa sportshylardyń fızıkalyq jaǵdaıyn muqııat baqylaıtyn 50-ge jýyq maman bardy. Dárigerler 24/7 jumys istep jatqanyn aıtty.

«Mınıstrlik Qazaqstan komandasy osy jarystarǵa barynsha qolaıly jaǵdaıda qatysa alatyndaı úlken jumys atqardy, al sportshylar men jattyqtyrýshylar-kez kelgen ýaqytta dárigerler men jedel shtab tarapynan qoldaýǵa sene alady. Árıne, bizdiń kúsh-jigerimiz beker bolmaı, ulttyq qurama Azıadada sátti óner kórsetip, óz jemisin beredi dep úmittenemiz. Biz jarystyń bastalýyn kútemiz, sportshylarymyzdy qoldaımyz jáne olardyń jeńisine senemiz», - dedi Ermek Marjyqpaev.