Týrızm salasynda 83 ınfraqurylymdyq joba iske asyrylyp jatyr

ASTANA. QazAqparat - Qazaqstanda týrıstik ınfraqurylymdy damytý baǵytynda jumys jalǵasýda. Qazirgi ýaqytta 83 ınfraqurylymdyq joba iske asyrylyp jatyr. Olardyń barlyǵynda jobalyq-smetalyq qujattama bar.

Bul týraly QazAqparat QR Mádenıet jáne sport mınıstrliginiń baspasóz qyzmetine silteme jasap habarlaıdy.

Sonymen qatar, tabıǵatty qorǵaý aýmaqtaryn qamtıtyn jobalar, atap aıtqanda – Imantaý-Shalqar kýrortty aımaǵynda avtojoldar salý jáne rekonstrýktsııalaý, sondaı-aq Jasybaı kóline deıingi uzyndyǵy 15 km kirme joldy ortasha jóndeý jobasy júzege asyrylýda. Jaǵajaı demalysynyń tanymaldyǵynyń artýyn eskere otyryp, mańyzdy jobalardyń biri - Abaı oblysyndaǵy Alakól kóliniń jaǵalaýyn nyǵaıtý jumystary jáne Balqash qalasyndaǵy Bertis shyǵanaǵynyń jaǵalaýyn abattandyrý bolyp tabylady. Tıisti qarjylandyrý bolǵan jaǵdaıda, bul jobalardy iske asyrý jaqyn arada josparlanyp otyr.

«Júrgizilip jatqan jumystar eldiń ınvestıtsııalyq tartymdylyǵyn arttyrýǵa jáne týrıstik ınfraqurylymdy jaqsartýǵa arnalǵan. Eldi mekenderden tys jerlerde jáne ulttyq parkter aýmaǵynda ınfraqurylymdy damytýdyń túıindi máselelerin sheshý maqsatynda ákimdikterge tıisti quzyret berý boıynsha jumystar júrgizilýde»-dedi Mádenıet jáne sport vıtse-mınıstri Erjan Erkinbaev.

Ótken jyly 28 joba aıaqtaldy. Olardyń ishinde Balqash kýrortty aımaǵynda ınjenerlik kommýnıkatsııa salý jáne Aqtaý qalasynyń jyly jaǵajaıyna deıin avtomobıl jolyn salý asa mańyzdy. Úsharal men Úrjardaǵy áýejaılardyń iske qosylýy aıtýly oqıǵa boldy, ol elimizdiń áýe tasymaly múmkindikterin keńeıtti.