Týrızm salasyndaǵy negizgi kapıtalǵa qosylǵan ınvestıtsııa kólemi eki ese artty

<p>ASTANA. KAZINFORM &ndash; Osy jyldyń qańtar-mamyr aılarynda týrızm salasyndaǵy negizgi kapıtalǵa qosylǵan ınvestıtsııa kólemi óskeni baıqalady. Osy kezeńde kórsetkish 271,2 mlrd teńgeni qurady. Bul ótken jyldyń sáıkes kezeńimen salystyrǵanda 2 ese kóp. 2023 jyly ınvestıtsııa kólemi 130,1 mlrd teńgeni quraǵan. Bul týraly QR Týrızm jáne sport mınıstrligi málimdedi.</p>

Týrızm salasyndaǵy negizgi kapıtalǵa qosylǵan ınvestıtsııa kólemi 14 baǵyt boıynsha baǵalanady. Olarǵa óner, tamaqtaný, oıyn-saýyq, demalys jáne jatyn oryndary, kólik, kitaphanalar, muraǵattar men murajaılar, jalǵa berý qyzmetteri, týrıstik bıznes, sport jáne demalys uıymdastyratyn mekemeler kiredi.

9 oblysta ınvestıtsııa kóleminiń artqany anyqtaldy. Astana, Almaty qalalarynda, Soltústik Qazaqstan, Qyzylorda, Qostanaı oblystarynda kórsetkishtiń aıtarlyqtaı óskeni belgili boldy.

«Bul kórsetkishter týrızm salasynyń ınvestorlar úshin tartymdy bola túskenin dáleldeıdi. Biz salany odan ári damytyp, oǵan kapıtal tartý úshin qolaıly jaǵdaı jasaýdy jalǵastyramyz», - dedi Týrızm ındýstrııasy komıtetiniń tóraǵasy Nurtas Káripbaev.