Týrızm salasy boıynsha 7 600-den astam jumys orny qurylady - mınıstrlik

<p>ASTANA. KAZINFORM - Týrızm salasynan bıýdjetke túsetin salyq túsimderi 450 mlrd teńgeni qurady. Bul 2022 jylǵy kórsetkishten 64 mlrd teńgege artyq. Bul týraly Ortalyq kommýnıkatsııalar qyzmeti alańynda ótken baspasóz konferentsııasynda QR Týrızm jáne sport mınıstrligi Týrızm ındýstrııasy komıtetiniń tóraǵasy Nurtas Káripbaev málimdedi.</p>

2023 jyly negizgi kapıtalǵa salynǵan ınvestıtsııalar kólemi joǵary boldy. Bıyl bul kórsetkish 787 mlrd teńgeni qurady. Bul aldyndaǵy jyldyń sáıkes kezeńimen salystyrǵanda 53%-ǵa artyq. 2024 jyldyń birinshi toqsanynyń qorytyndysy boıynsha atalmysh kórsetkish 3 esege artyp, 177 mlrd teńgege jetti. Ótken jyldyń qorytyndysy boıynsha Qazaqstanda 57 mlrd teńgege 117 jańa týrıstik nysan ashyldy. Taǵy jalpy somasy 430 mlrd teńgege 297 ınvestıtsııalyq joba iske asyrylyp jatyr.

«Olar júzege assa, 7647 jumys orny ashylady. Atalǵan jumys oryndarynyń 3219-y turaqty, 4428-i ýaqytsha bolady, sondaı-aq 10 myńnan astam tósek-oryn jasaqtaý josparlanyp otyr. 2024 jyldyń sońyna deıin jalpy somasy 246 mlrd teńgege 148 jobany aıaqtaý josparlanyp otyr. Bul jobalar 2457 jumys orny men 5970 tósek-oryn qurýǵa múmkindik beredi», - dep atap ótti komıtet basshysy.

Týrızm jáne sport mınıstrligi týrızm salasy boıynsha ınvestıtsııalyq áleýetti damytýǵa basa nazar aýdaryp otyr. Basym aýmaqtardyń tizimi TOP-20-ǵa deıin keńeıtildi. Osylaısha, barlyq aımaqta áleýeti zor oryndar anyqtaldy. Ár destınatsııada basymdyq beriletin týrıstik aýmaqtar qurý josparlanýda.