Týrızm mınıstrligi men Dúnıejúzilik etnosport konfederatsııasy arasynda Memorandýmǵa qol qoıyldy

<p>ASTANA. KAZINFORM - Týrızm jáne sport mınıstri Ermek Marjyqpaev elordadaǵy 5-shi Dúnıejúzilik kóshpendiler oıyndaryn uıymdastyrý komıtetiniń atqarýshy dırektsııasynda Dúnıejúzilik etnosport konfederatsııasynyń prezıdenti Bilál Erdoǵanmen kezdesip, aldaǵy Oıyndardy uıymdastyrýǵa qatysty birqatar máseleni talqylady.</p>

QR Týrızm jáne sport mınıstrligi baspasóz qyzmetiniń habarlaýynsha, taraptar Dúnıejúzilik kóshpendiler oıyndaryna qatysatyn elderdiń geografııasyn keńeıtý, demeýshilerdi tartý, Oıyndardyń halyqaralyq telehabarlaryn uıymdastyrý jáne 5-shi Dúnıejúzilik kóshpendiler oıyndarynyń qatysýshylaryn áýetasymaldaý boıynsha járdemdesý jaıyn sóz etti. Sonymen qatar Ermek Marjyqpaev pen Bilál Erdoǵan kezdesý barysynda ózara yntymaqtastyq týraly Memorandýmǵa qol qoıdy.

Qazirgi ýaqytta Dúnıejúzilik etnosport konfederatsııasy – álemdegi serpindi damýshy sporttyq uıymdardyń biri. Jaqynda Antalııadaǵy 6-shy etnosport forýmy uıymnyń qazirgi ýaqytta álemdegi dástúrli sport pen oıyndardy damytýdyń negizgi qozǵaýshy kúshi ekenin rastady.

«Dúnıejúzilik etnosport konfederatsııasyn 5-shi Dúnıejúzilik kóshpendiler oıyndarynyń birlesip uıymdastyrýshysy mártebesin alýymen quttyqtaımyn. Birlesken kúsh-jiger arqyly qatysýshy elderdiń keń geografııasy qamtyla otyryp, Oıyndar joǵary deńgeıde ótetinine senimdimin. 2022 jyly Iznık (Túrkııa) qalasynda uıymdastyrylǵan tórtinshi Dúnıejúzilik kóshpendiler oıyndary asa joǵary deńgeıde ótkenin aıtqym keledi. Álemniń 102 elinen 3000 astam sportshynyń qatysýy – Oıyndardyń aýqymdy bolǵanynyń kórsetkishi. Bul sózsiz Dúnıejúzilik etnosport konfederatsııasy komandasynyń úlken úlesi», - dep atap ótti Ermek Marjyqpaev.

Sonymen qatar jıyn barysynda Ermek Marjyqpaev pen Bilál Erdoǵan kelesi Dúnıejúzilik kóshpendiler oıyndaryn ótkizetin eldi anyqtaý máselesin qarastyrdy. Bul máseleni Túrki memleketteri uıymyna múshe memleketterdiń jastar jáne sport mınıstrleri otyrysynyń kún tártibine engizý usynyldy.

Kezdesý sońynda mınıstr Oıyndardy uıymdastyrý komıteti resmı is-sharalarǵa qatysý úshin Dúnıejúzilik etnosport konfederatsııasynyń delegatsııany qabyldaýǵa daıyn ekenin jetkizdi. Al Bilál Erdoǵan óz tarapynan 5-shi Dúnıejúzilik kóshpendiler oıyndaryn oıdaǵydaı ótkizýge jan-jaqty qoldaý kórsetýge daıyn ekendigin bildirdi.