Týrıstik oryndardaǵy dárethana máselesi jeke bıznespen birlesip sheshiledi – mınıstrlik

NUR-SULTAN. QazAqparat – Týrıstik oryndardaǵy dárethana máselesin jeke bıznesti tartý arqyly sheshý kerek. Bul pikirdi QR Mádenıet jáne sport mınıstri Dáýren Abaev aıtty, dep habarlaıdy QazAqparat.

«Bıyl 1 qańtardan bastap týrıstik salada memlekettik qoldaýdyń jańa sharalary qoldanysqa engizildi. Olardy jetildirý maqsatynda biz Májilis depýtattary bastamashylyq etken týrıstik salany qoldaý máseleleri jónindegi zań jobasy aıasynda jumys júrgizip jatyrmyz. Sonymen qatar óńirlerdiń nazaryn dárethanalardyń jaǵdaıyna aýdarǵym keledi. Atalǵan máseleni jeke bıznesti tartý arqyly sheshken durys», - dedi mınıstr Úkimettiń búgingi otyrysynda.

Onyń aıtýynsha, qazaqstandyq týrıstik operatorlar ár kezdesý saıyn dárethana jetispeýshiligi máselesin kóteredi.

«Ákimdikter dárethana salady. Biraq munda bir másele bar, mysaly Qaıyńdyda týrıster kóptep keletin tamasha oryn bar. Dárethanalar salynǵan, biraq olar jumys istemeıdi. Óıtkeni, dárethanalardy tolyq jabdyqtaý júıesine qosý, sý tartý óte qymbat. Endi biz ákimdiktermen jáne bıznespen birlesip, osy ınfraqurylymdy joǵary kótermeı-aq, basqa da amaldaryn izdep jatyrmyz», - dedi Dáýren Abaev.