«Týrıstik Qamqor» qoryna aýdarym jasamaǵan týroperatordyń qyzmeti zańsyz dep tanylady

ASTANA. QazAqparat - Shetelde demalýǵa baryp, túrli sebeptermen elge orala almaı qalǵan qazaqstandyqtarǵa qol ushyn sozatyn «Týrıstik Qamqor» qory bıyl da jumysyn jalǵastyrady, dep habarlaıdy QazAqparat tilshisi.

Týrıstik naryqtyń keıbir ókilderiniń kinásynan qazaqstandyq týrısterdiń kópshiligi shetelderde jatatyn oryndary tólenbeı nemese qaıtatyn bıletteri bolmaı qalyp jatady. Kóp jaǵdaıda týrıstik operatorlardyń bankrot bolýymen, ne bolmasa alaıaqtyq saldarynan sheteldegi qazaqstandyqtar túrli jaǵdaılarǵa tap bolýda.

«Osy ýaqyt aralyǵynda barlyǵy 12 myń adam (shetelde demalǵan qazaqstandyqtar - avt.) zardap shekken. Al shyǵyn kólemi 10 mln dollardan asyp tústi. Máselen, 2012 jyly bir týroperator Grekııada 450-ge jýyq týrısti tastap ketken bolatyn. 2013 jyly taǵy bir týrpoperator 620 adamdy qaldyryp ketti. Osy jaǵdaılardyń aldyn alý úshin sheteldegi qazaqstandyqtarǵa qol ushyn sozatyn shuǵyl kómek berý qory quryldy. Bul - «Týrıstik Qamqor» korporatıvtik qory», - dedi QR Mádenıet jáne sport mınıstrligi Týrızm ındýstrııasy komıtetiniń tóraıymy Maınur Myrzamadıeva OQK-da ótken baspasóz máslıhatynda.

Onyń aıtýynsha, joǵaryda atalǵan jaǵdaılar týyndaǵan jaǵdaıda ol qor shet elden jete almaı  qalǵan qazaqstandyqtardy elge qaıtaratyn bolady. Qorǵa qatysýshy týroperator árbir joldanatyn týrıst úshin 0,5 AEK kóleminde aýdarym jasaýy tıis. Bulaı bolmaǵan jaǵdaıda týroperator zańsyz qyzmetti júzege asyrdy dep esepteledi.