«Týrıstik agenttik 45 mln teńgege aldady»: Almatylyqtar vıdeoúndeý jarııalady

ALMATY. QazAqparat - Almatyda 50 adam týrfırmalardyń birine aldanyp qaldy, dep habarlaıdy QazAqparat tilshisi.

Zardap shekkenderdiń biri Іnstagram-daǵy óz paraqshasynda vıdeoúndeý jarııalady. Onyń aıtýynsha, bıyl jazda olar shetelde demalý úshin «Imagine Events» týrıstik kompanııasyna júgingen. Kompanııa qyzmetkerleri klıentterge Túrkııa, Maldıv araldary, Chernogorııa, Mysyr jáne basqa da baǵyttarǵa týr satqan. Alaıda belgilengen kúni olardyń eshqaısysy bılet almaǵan.

Onyń aıtýynsha, qazirge deıin 50 zardap shegýshi jınalǵan. Aldyn ala keltirilgen shyǵyn kólemi 45 mıllıon teńgeden asady. Biraq bul kórsetkish eki ese kóp bolýy múmkin.

Almaty Polıtsııa departamenti zardap shekkenderdiń aryzy qabyldanǵanyn málim etti.

«Qylmystyq kodekstiń 190-baby 4-bóligi («Asa iri kólemdegi alaıaqtyq») boıynsha qylmystyq istiń materıaldary óndiriste jatyr. Іstiń mán-jaıyn anyqtaýǵa jáne bolashaqta kinálilerdi jaýapkershilikke tartýǵa baǵyttalǵan qajetti jedel-izdestirý sharalarynyń kesheni júrgizilýde», - dep habarlady polıtsııadan.