Túriktiń tarıxı kınosyna shaqyrsa, túsýge daıynmyn - Samal Eslıamova

ASTANA. QazAqparat - Kann festıvaliniń jeńimpazy, ártis Samal Eslıamova Aqordada QR Prezıdenti Nursultan Nazarbaevpen bolǵan kezdesýge qatysty, dep xabarlaıdy QazAqparat tilshisi.

Kezdesýden keıin túrik arnasynyń jýrnalısi ártisten tarıxı kınoǵa túsý jaıynda surady.

«Samal, sizdi Qazaqstanda ǵana emes, Túrkııada da jaqsy biledi. Ol jaqtan usynys tússe, máselen, tarıxı kınoǵa shaqyrsa, barasyz ba?», - dep surady tilshi.

«Árıne, kelisemin. Men - aktrısamyn. Sondyqtan barlyq rólderdi qarastyrýǵa daıynmyn. Tarıxı fılmder bolsyn, komedııa, tragedııa, kez kelgen fılmge túsýge ázirmin. Endi, «Aıkadan» keıin kóbisi meni tragedııalyq ártis dep sanaıdy. Biraq ınstıtýtta oqyǵanda, artynan saxnaǵa shyqqanda men komedııalyq rólderdi de oınadym», - dep jaýap berdi S.Eslıamova.

Aıta keteıik, búgingi kezdesýde Kann festıvaliniń jeńimpazy, ártis Samal Eslıamova aldaǵy josparlary týraly aıtty. «Aldymen kishkene demalaıyn dep edim. Sodan keıin 20 naýryzǵa qaraı Gonkongqa baramyn. Ol jaqta «Azııanyń úzdik aktrısasy» degen atalymǵa usyndy. Kóremiz, múmkin jeńis bolady», - dedi ártis. Budan bólek, S.Eslıamova jýrnalısterdiń «Juldyz bolǵan qalaı eken?» degen suraǵyna jaýap berdi.