Túriktiń Alarko holdıngi Qazaqstannyń agrosektorynda birqatar iri jobalar qurýdy josparlap otyr

ASTANA. QazAqparat - Túriktiń iri holdıngteriniń biri Alarko Holding Qazaqstan agrosektorynyń birqatar jobasyna ınvestıtsııa salýǵa daıyn. Aýyl sharýashylyǵy vıtse-mınıstri Baǵlan Bekbaýov pen kompanııa prezıdenti Nýrı Iyldyzdyń kezdesýinde yntymaqtastyq perspektıvalary týraly aıtyldy, dep habarlaıdy QR AShM baspasóz qyzmeti.

Atap aıtqanda, túrik ınvestory Qazaqstan aýmaǵynda ashyq topyraqtaǵy jylyjaı keshenderi, organıkalyq-mıneraldy tyńaıtqyshtar óndirý, azyq-túlikti óńdeý jáne satý jónindegi kásiporyndar, sondaı-aq ǴZTKJ-da jobalardy qurý múmkindigin qarastyryp otyr.

Vıtse-mınıstr AShM jelisi boıynsha saladaǵy memlekettik qoldaý sharalary týraly aıtyp berdi. Qazirgi ýaqytta óndirýshilerdiń tyńaıtqyshtar, pestıtsıdter, bıoagentter men bıopreparattardy quny, sondaı-aq sýarý jáne tuqym satyp alý shyǵyndary sýbsıdııalanady.

Budan bólek, jylyjaı keshenderin salý jáne keńeıtý jónindegi jobalardy iske asyrý kezinde shyǵyndardyń 25% óteý kózdelgen, normatıvterdi 30%-ǵa deıin ulǵaıtý boıynsha jumystar júrgizilip jatyr. Sondaı-aq, maýsymaralyq kezeńde elektr energııasy men gazǵa arnalǵan shyǵyndardy sýbsıdııalaýdy engizý kózdelip otyr.

Baǵlan Bekbaýov qoldanystaǵy tek ashyq topyraqtaǵy kókónisterdi gektaryna shamamen 200 myń teńge esebinen qarjylandyrýdy kózdeıtin «Ken dala» baǵdarlamasyna jabyq topyraqtaǵy kókónis óndirýshilerdi engizý jospary týraly aıtyp berdi.

AShM óz tarapynan barlyq qajetti jaǵdaılardy usynýǵa jáne jan-jaqty qoldaý kórsetýge daıyn, dep tolyqtyrdy vıtse-mınıstr.

Alarko Holding - kólik, munaı-gaz sektory, energetıka, ónerkásip, týrızm, jerge ornalastyrý salasyndaǵy jobalardy ınvestıtsııalaıtyn jáne iske asyratyn álemdegi eń iri kásiporyndardyń biri. Holdıngtiń 2030 jylǵa deıin aýyl sharýashylyǵyna shamamen 100 mln dollar ınvestıtsııalaý jospary bar.