Túrikmenstannyń vıtse-mınıstri Túrki keńesine baǵa berdi
«Túrikmenstannyń syrtqy saıasatynyń mańyzdy baǵyttarynyń biri – irgeles ornalasqan kórshi eldermen qarym-qatynasty odan ári damytý jáne nyǵaıtý. Árıne, Túrikmenstannyń syrtqy saıasatynda qoldanystaǵy aımaqtyq formattar nemese aımaqtyq uıymdar men halyqaralyq qurylymdar aıasynda keńeıtilgen ekonomıkalyq, áleýmettik jáne saıası ıntegratsııa múmkindikterin keńeıtý mańyzdy oryn alady. Ózderińiz bilesizder, túrki memleketteri yntymaqtastyǵy keńesiniń músheleri Túrkimenstanǵa jaqyn ornalasqan. Bizdi tereń tarıhı, tildik, etnıkalyq, mádenı-gýmanıtarlyq jaqyndyqtar baılanystyrady. Atalǵan keńeske múshe eldermen óte tyǵyz saýda-ekonomıkalyq, kólik-energetıkalyq ózara is-qımyl, birlesken jobalar men dálizderdi qolǵa alǵanbyz. Jýyrda ótken Túrki elderi Memleket basshylarynyń sammıtine neǵurlym belsendi qatysý týraly sheshimdi dál osyndaı alǵysharttarmen túsindirýge bolady», - dedi Vepa Hadjıev.
Vıtse-mınıstrdiń aıtýynsha Túrikmenstannyń Túrki keńesine baqylaýshy el retinde kirýi – túrki memleketterimen ózara is-qımyldyń sapaly jańa kezeńiniń bastalýyn bildiretin mańyzdy oqıǵa.
«Búgin biz túrki tildes memleketterdiń yntymaqtastyq keńesi aıasynda, jańa format aıasynda Túrki keńesi elderimen áriptestiktiń jańa kezeńine aıaq bastyq. Sammıt barysynda Memleket basshysy elimizdiń osy uıymǵa baqylaýshy retinde qatysýy jónindegi negizgi ustanymdaryn, sondaı-aq birlesken jumysymyzdyń basym baǵyttaryn atap ótti. Bizdiń elimiz baýyrlas halyqtar men elder arasyndaǵy baılanystardy nyǵaıtýdy jaqtaıdy», - dedi Túrikmenstan syrtqy ister mınıstriniń orynbasary.