Túrikmenstandyqtar Qazaqstan memlekettik basqarý akademııasynyń tájirıbesin zerttedi
Qazaqstan Respýblıkasy Prezıdenti janyndaǵy Memlekettik basqarý akademııasynyń tájirıbesi negizinde Túrikmenstan Prezıdenti janyndaǵy Memlekettik qyzmet akademııasynda magıstratýranyń bilim berý baǵdarlamalary engiziletin bolady.
«Búgingi tańda Túrikmenstan Prezıdenti janyndaǵy Memlekettik qyzmet akademııasynda memlekettik qyzmetshilerdiń biliktiligin arttyrýdyń qysqa merzimdi kýrstary ǵana oqytylady. Túrikmen delegatsııasy músheleriniń sózine sensek, olar qazaqstandyq tájirıbeni zerdelep, 2019 jyldyń kúzinde memlekettik qyzmetshilerge arnalǵan magıstratýra baǵdarlamasyn engizýdi josparlap otyr» delingen habarlamada
Memlekettik basqarý akademııasynyń rektory Fatıma Jaqypovanyń aıtýynsha., búgingi tańda memlekettik basqarý salasy qarqyndy damyp jatyr.
«Bul protsess álemdik trendterge beıimdelýdiń kúrdeliligi jáne qajettiligimen sıpattalady. Memlekettik qyzmetshilerge barynsha joǵary talaptar qoıatyn jahandyq jáne jergilikti syn-tegeýrinder kúsh-jigerdi biriktirýdi talap etedi. QR Prezıdentiniń janyndaǵy Memlekettik basqarý akademııasy bilimdi taratýdyń ınnovatsııalyq alańy bola otyryp, Qazaqstannyń ǵana emes, sonymen qatar Ortalyq Azııa elderiniń memlekettik apparatyn kásibılendirýge eleýli úles qosady»,-dep atap ótti ol.
Osy aptada Túrikmenstan Prezıdenti janyndaǵy Memlekettik qyzmet akademııasynyń qyzmetkerlerine arnalǵan memlekettik basqarý salasynda kásibı bilim berý baǵdarlamalaryn ázirleý máseleleri boıynsha praktıkalyq trenıng aıaqtaldy. Trenıng Túrikmenstandaǵy memlekettik qyzmetshilerdiń áleýetin arttyrýǵa qoldaý kórsetý boıynsha Eýroodaq jobasynyń kómegimen uıymdastyryldy. Bes kún ishinde strategııalyq sessııalar, ınteraktıvti pikirtalastar jáne praktıkalyq keıster formatynda túrikmendik delegatsııa bilim berý baǵdarlamalarynyń dızaınyn jáne kontentin, sıllabýstardy, magıstrlik baǵdarlamalardyń kýrstary men modýlderi boıynsha oqý josparlaryn ázirleý boıynsha Akademııanyń tájirıbesin zerttedi. Bilimdi sapaly jáne tez ıgerý qajettiligin eskere otyryp, sabaqtardy ótkizý ádistemesi tálimgerlik prıntsıpi boıynsha ázirlendi, tyńdaýshylardyń árqaısysyna Akademııanyń jetekshi oqytýshylary bekitildi.
Astanaǵa sapary aıasynda túrikmen delegatsııasy Memlekettik qyzmet personalyn basqarý ulttyq ortalyǵyna, «Astana - adaldyq alańy» jobalyq ofısine bas suqty. Túrikmenstannan kelgen qonaqtar qazaqstandyq sybaılas jemqorlyqqa qarsy strategııamen, memlekettik apparatty kásibılendirýdegi jańa trendtermen, sybaılas jemqorlyqtyń aldyn alý, memlekettik qyzmet júıesindegi ózgeristermen, sondaı-aq rekrýtıng naryǵyndaǵy ınnovatsııalarmen, strategııalyq menedjmentpen, oqytý barysynda qoldanylatyn zamanaýı HR-tehnologııalarmen tanysty. Trenıngtiń sońynda ázirlengen oqý baǵdarlamalary kópshilik nazaryna usynyldy.
Túrikmen delegatsııasynyń ókilderi QR Prezıdenti janyndaǵy Memlekettik basqarý akademııasynyń komandasyna alǵys aıtyp, oqý baǵdarlamasynyń joǵary nátıjeliligi men praktıkalyq paıdasyn atap ótti.