Túrikmenstanda salynyp jatqan Arkadag qalasyna memlekettik mártebe berildi
«Arkadag qalasy týraly» Túrikmenstan zańyna sáıkes Arkadag qalasyna erekshe quqyqtyq dáreje – memlekettik mańyzy bar qala dárejesi berilgendikten, Túrikmenstan Prezıdenti Ahal ýáláıaty Arkadag qalasy ákimdiginiń ataýyn Arkadag qalasy ákimdigi dep aýystyrǵan qaýlyǵa qol qoıdy.
Qujat arqyly Arkadag qalasy ákimdigine Ádilet mınıstrligimen birigip, bir aı ishinde osy qaýlyǵa sáıkes Túrikmenstan zańnamasyna ózgerister men tolyqtyrýlar engizý týraly usynysty daıyndap, Mınıstrler kabınetine usyný mindetteldi.
Fergana News agenttiginiń habarlaýynsha, Arkadag qalasynyń qurylysy 2019 jyldyń sáýirinde bastaldy. Birinshi kezektegi nysandardyń saltanatty ashylýyn jaqyn kúnderi ótkizý josparlanyp otyr. Jospar boıynsha bul smart, ıaǵnı «aqyldy qala» bolady. Munda elektrobýstar men elektromobılderdiń qozǵalysy uıymdastyrylady, kún batareıalary men jel generatorlary ornatylady.
Byltyr jeltoqsanda Gýrbangýly Berdimuhamedov SІM basshysy Rashıd Meredovke jańa qalany «óńirdegi eń iri, erekshe ári ádemi qala» retinde Gınness rekordtar kitabyna engizý máselesimen aınalysýdy tapsyrǵan.
Buryn Ahal ýáláıatynyń ákimshilik ortalyǵy Ashhabad bolatyn, keıin ol jeke ákimshilik aýmaqqa aınaldy. Qazir óńir astanasy – Ashhabadtan segiz shaqyrym jerde ornalasqan Annaý qalasy.