Túrikmenstanda Qazaqstanda shyǵarylatyn qurylys materıaldary tanystyryldy

ASTANA. QazAqparat - Bes qazaqstandyq óndirýshi «Túrikmen qurylysy - 2018» halyqaralyq kórmesinde qurǵaq qurylys qospalaryn, rels-arqalyq, tereze fýrnıtýralaryn, boıaýlar men shyny paketterin jurt nazaryna qoıdy. Ashhabadtaǵy kórmede otandyq stendini Qazaqstannyń Syrtqy saýda palatasy uıymdastyrdy, dep habarlaıdy Palatanyń baspasóz qyzmeti. 

Kórmeniń negizgi maqsaty - zamanaýı tehnologııalardy, jobalardy jáne básekege qabiletti ónimderdi pash etý, saýda-ekonomıkalyq baılanystardy keńeıtý, ınnovatsııalyq tehnologııalar salasynda tájirıbe almasý, taýar óndirýshiler jáne tutynýshylar arasyndaǵy baılanystardy jolǵa qoıý. «Túrikmen qurylysy - 2018» halyqaralyq kórmesine álemniń 14 elinen - Qytaı, Reseı, Germanııa, Ispanııa, BAÁ, Avstrııa, Frantsııa, Grekııa, Fınlıandııa, Polsha, Túrkııa, Qazaqstan, Ázerbaıjan, Ýkraınadan 130-dan astam kompanııa qatysty.

Kórme qorytyndysy boıynsha «Aqtóbe rels-arqalyq zaýyty» JShS Túrikmenstan Respýblıkasynyń Temirjol kóligi mınıstri Azat Atamuradovpen kelissózder júrgizip, onyń barysynda Túrikmenstan temir joldaryn aldaǵy úsh jylda jańǵyrtý josparlary jarııa etildi. Osy kezdesý qorytyndysy boıynsha, ARAZ 39 myń tonna kólemindegi temirjol relsin jetkizip berý týraly kelisimshartqa qol qoıý máselesin qarastyrýda.

Qazaqstandyq tarap túrikmen kásipkerlerimen kelissózder barysynda jalpy somasy 30 myń AQSh dollaryna «Elif Chemicals»  JShS qurǵaq qurylys qospalaryn jetkizip berý shartyna qol qoıdy.