Túrikmenstanda halyqaralyq teńiz porty iske qosyldy

ASTANA. QazAqparat - Túrikmenstanda Kaspıı teńiziniń jaǵasynda jańa Halyqaralyq teńiz porty jumysyn bastady, dep habarlaıdy QazAqparat tilshisi «Týrkmenıstan Segodnıa» aqparat kózine silteme jasap. 

Aqparat kóziniń habarlaýynsha, porttyń jalpy aýmaǵy 1 mıllıon 358,5 myń sharshy metrdi quraıdy. Kemelerdiń aılaqqa jaqyndaýyn qamtamasyz etý úshin 10 mıllıon kýbometr topyraq qazylyp, teńizdi tereńdetý jumysy júrgizilgen. Eni 20 metrlik aılaqtyń jalpy uzyndyǵy 3 myń 600 metrge jetedi. Bul birneshe kemeni qabyldap, olarǵa qyzmet kórsetýge múmkindik beredi.

Jańa keshenniń quramynda paromǵa, jolaýshylarǵa jáne konteınerlerge arnalǵan termınaldar, sonymen birge keme quraý jáne keme jóndeýge arnalǵan zaýyttar bar. Aılaqty gıdrotehnıkalyq qurylymdardyń qurylysynan bólek, munda jaǵalaýdaǵy ınfraqurylymnyń kóptegen nysandary, onyń ishinde kóliktik qyzmet kórsetý nysandary ornalastyrylǵan: jalpy uzyndyǵy 3,9 myń metrlik estakadty avtojoldar men 30 myń metrge deıin baratyn temir jol bar.

Tehnıkalyq turǵydan alǵanda jańa port eń zamanaýı baǵdarlamalyq-apparattyq keshendermen qamtylǵan. Port aýmaǵyndaǵy kemelerdiń qozǵalysyn, tıeý-túsirý jumystaryn barlyq ýchastoktarda avtomattandarylǵan júıelerdiń jáne elektrondy tehnologııalardyń kómegimen júzege asyrady.

Aıta keterligi, Kaspıı teńiziniń ekologııasyn qorǵaý úshin ár termınalda bıotazartqysh qurylǵylar ornatylǵan. Jalpy, barlyq joba «Jasyl port»  (Green port) halyqaralyq standarttarynyń talaptary boıynsha jasalǵan. Teńizdi tereńdetý kezinde qazylǵan topyraq jalpy aýmaǵy 170 gektarlyq qoldan jasalǵan araldy salý úshin jumyldyrylǵan. Port salýdyń dál osyndaı amalyn halyqaralyq birlestikter joǵary baǵalap otyr.

Avazdaǵy Kongress-ortalyqta ótken halyqaralyq kóliktik forýmda Túrikmenbashyǵa jańa port úshin sertıfıkat tabystaldy.