Túrikmenstan, Tájikstan, Qyrǵyzstan azamattary Germanııada terakt jasamaq bolǵan

BERLIN. QazAqparat - Germanııanyń ishki ister mınıstrligi lańkestik áreketti daıyndap jatqan qylmystyq toptyń ustalǵany týraly málimdedi. Aqparatqa qaraǵanda ustalǵandar Ortalyq Azııa elderinen shyqqan, dep habarlaıdy QazAqparat Euronews arnasyna silteme jasap.

Germanııa men Nıderlandyda Ortalyq Azııa elderinen kelgen toǵyz ımmıgrantty terrorızmge qatysy bar degen aıyppen ustady. Tergeýshilerdiń aıtýynsha, olar Germanııada shabýyldar daıyndap, «Islam memleketi» lańkestik tobynyń qyzmetine aqsha jınap júrgen. Málimetterge sáıkes, kúdiktiler Aýǵanstanda jáne kórshiles elderde ornalasqan ıslamshylarmen baılanysta bolǵan.

Soltústik Reın-Vestfalııanyń ishki ister mınıstri Gerbert Roýldyń aıtýynsha, ustalǵandar 20 men 46 jas aralyǵyndaǵy Túrikmenstan, Qyrǵyzstan jáne Tájikstan azamattary. Tergeýshilerdiń málimetine qaraǵanda, olar qazirdiń ózinde kýratorlardan shabýyl jasaý týraly nusqaý alyp, daıyndyqty bastap ketken, biraq naqty málimetter áli pysyqtalǵan joq. Prokýratýra qolda bar derekter top músheleri dep boljanǵan adamdardy ustaýǵa jetkilikti dep sanady.