Túrikmenstan Prezıdentiniń Qazaqstanǵa saparynda birqatar qujatqa qol qoıylady – SІM
Bul týraly QR Syrtqy ister mınıstrliginiń resmı ókili Aıbek Smadııarov aıtty.
«Memleket basshysynyń shaqyrýymen bıylǵy 15 qazanda Túrikmenstan Prezıdenti Serdar Berdimuhamedovtyń Qazaqstanǵa alǵashqy memlekettik sapary ótedi. Sapar eki el arasyndaǵy dıplomatııalyq qatynastardyń ornaǵanyna 30 jyl tolýyna oraı uıymdastyryldy», - dedi Aıbek Smadııarov mınıstrlikte ótken brıfıngte.
Bul sapar saıası, saýda-ekonomıkalyq, kólik-tranzıttik jáne mádenı-gýmanıtarlyq yntymaqtastyqty, sondaı-aq qazaq-túrikmen strategııalyq áriptestigin arttyrýǵa baǵyttalǵan.
«Sapar barysynda taraptar keń aýqymdy máselelerdi, óńirlik jáne halyqaralyq kún tártibindegi ózekti taqyryptardy talqylaýdy josparlap otyr. Іs-shara qorytyndysy boıynsha birqatar ekijaqty qujattarǵa qol qoıý josparlanýda», - deıdi resmı ókil.
Sonymen birge, Serdar Berdimuhamedov 12-13 qazan kúnderi Azııadaǵy ózara is-qımyl jáne senim sharalary jónindegi keńestiń VI sammıtine de qatysady.
Aıta keteıik, bul aptada Qatar, Túrkııa jáne Túrikmenstan basshylary Qazaqstanǵa memlekettik saparmen keledi.