Túrikmenstan Parlamenttiń qos palataly júıesine aýysady
25 qyrkúıekte Halyq Maslahatynyń ( eldiń joǵarǵy ókildik organy) ekinshi otyrysynda Túrikmenstan Prezıdenti Gýrbangýly Berdimuhamedov qos palataly júıege aýysýdyń durystyǵyn atap ótti. Osy oraıda Túrikmenstannyń Halyq Maslahaty men Túrikmenstan Medjlısiniń ókildik zańnamalyq bıliktiń maqsattaryn júzege asyratyn organdar júıesine qosylý bastamasy aıtyldy.
«Elde zańnamalyq júıeni ary qaraı damytý qadamy búginde zań shyǵarý qyzmetiniń tıimdiligin jetildirýdi talap etýde. Osyǵan baılanysty Túrikmenstan Halyq Maslahatynyń quqyqtyq mártebesin jetildirý boıynsha jumys júrgizý qajet. Álemdegi ózgerister men tájirıbeni eskere otyryp, qos palataly júıege kóshken jón. Bul turǵyda Túrikmenstannyń Halyq Maslahatyn jáne Túrikmenstannyń Medjlısin ókildik zańnamalyq bılik maqsattaryn iske asyratyn organdar júıesine qosý durys», - dedi atalǵan eldiń Prezıdenti.
Onyń sózine qaraǵanda, sapaly qos palataly júıege kóshý túrikmen qoǵamynyń barlyq toptarynyń múddesin qamtýǵa múmkindik beredi. Sonymen qatar, jergilikti jerlerde depýtattardyń saılaýshylarmen tyǵyz baılanys ornatýyna, zańdar men ulttyq baǵdarlamalardyń oryndalýyna baqylaýdy kúsheıtýge yqpal etetini aıtyldy.
Osy oraıda Gýrbangýly Berdimuhamedov Túrikmenstan Konstıtýtsııasyna ózgerister men tolyqtyrýlar engizý jóninde ǵylymı negizdelgen usynystardy ázirleý maqsatynda Konstıtýtsııalyq komıssııa qurý týraly Jarlyqqa qol qoıdy.
Belgili bolǵandaı, el Prezıdenti memorgannnyń qurylymyn jetildirý boıynsha usynysty 2020 jyly Túrikmenstan Halyq Maslahatynyń qaraýyna engizý bastamasyn kóterdi.